अझै तीन दिन भारी वर्षा हुने : कहाँ-कहाँ बाढीको जोखिम ? 

काठमाडौं- मनसुन पुनः सक्रिय भएसँगै देशका विभिन्न भागमा भारी वर्षा भएको छ । 

लगातार झरि नपरे पनि साँझ र बिहानको समयमा भने देशका धेरै ठाउँमा भारी वर्षा भएको छ । यो क्रम अगामी तीन दिनसम्म जारी रहने मौसम पूर्वानुमान महाशाखाले जनाएको छ ।  

अहिले पनि नवलपरासी, रुपन्देही, कैलाली लगायतका पश्चिमी जिल्लामा वर्षा भइराखेका मौसमविद् समिर श्रेष्ठले जानकारी दिए ।

काठमाडौं उपत्यकामा अहिले पानी पर्नेक्रम रोकिए पनि साँझ पुनः वर्षा हुन सक्ने उनले नेपाल समयलाई बताए । उनका अनुसार शुक्रबार बिहान मात्रै काठमाडौंमा २२ मिलिमिटर वर्षा भएको छ । 

उत्तर उडिसा र पश्चिम बंगाल नजिकै न्यूनचापीय प्रणाली कायम रहँदा आज दिउँसो देशभरी आंशिकदेखि सामान्य बदली रही थोरै स्थानहरुमा मेघ गर्जनसहित हल्कादेखि मध्यम वर्षा हुने सम्भावना रहेको पूर्वानुमान महाशाखाले जनाएको छ । 

पश्चिम र मध्य भेगका एक दुई स्थानमा भारी वर्षाको समेत सम्भावना रहेको जनाइएको छ । आगामी तीन दिनसम्म बदली र वर्षा भइरहने मौसमविद् श्रेष्ठले जानकारी दिए । केही समय निकै वर्षा हुने र केही समयमा नै सुधार हुने खालको मौसम रहेकाले सतर्क रहन उनले आग्रह गरे । 

कहाँ कहाँ बाढीको जोखिम

देशका विभिन्न ठाउँमा भारी वर्षा भएसँगै देशमा साना ठूला सबै नदीहरुमा बाढीको जोखिम बढेको छ । बाढी पूर्वानुमान महाशाखाका अनुसार आज र भोलि देशका प्रमुख नदीहरुमा वहाव बढ्न सक्नेछ ।  

आज सिन्धुली, दोलखा, सिन्धुपाल्चोक, मकवानपुर, चितवन, काठमाडौं, नुवाकोट, रसुवा, धादिङ्ग, गोरखा, तनहुँ कास्की, नवलपरासी, बाँके, बर्दिया, कैलाली, कञ्चनपुरका नदीमा वहाव बढेको महाशाखाले जनाएको छ ।  

त्यस्तै, आज राति सुर्खेत, दैलेख,जाजरकोट, जुम्ला र कालिकोटका साना नदीमा आकस्मिक वहाव हुन सक्ने जनाइएको छ । 

गएरातिदेखि नै दोलखा, रामेछाप, सिन्धुपाल्चोक, नुवाकोट, रसुवा, धादिङ्ग, गोरखा लमजुङ्ग, मकवानपुर, चितवन, नवलपरासी, कास्की, पर्वत, स्याङ्गजा, प्युठान, रोल्पा, सल्यान, रुकुम, सुर्खेत, जाजरकोट र आसपास मध्यम वर्षा भएको र नदीमा बहाव बढ्दो रहेको सो महाशाखाको भनाइ रहेको छ ।