काठमाडौं- केही दिन यता देशभर सक्रिय मनसुन कायमै रहेको छ। मनसुन सक्रिय हुँदा पछिल्ला दिनमा नेपालमा लगातार पानी परिरहेको छ।
वर्षाका कारण बाढीपहिरोका घटना बढ्न थालेको गृह मन्त्रालय आपतकालीन कार्यसञ्चालन केन्द्रले जनाएको छ।
आइतबार बिहान बागमती, प्रदेश १, २, गण्डकी र लुम्बिनी प्रदेशका केही स्थानमा हल्कादेखि मध्यम वर्षा भइरहेको छ। काठमाडौं उपत्यकामा भने बिहानै भारी वर्षा भइरहेको हो।
आज दिउँसो पनि अधिकांश भूभागमा पानी पर्नेछ। प्रदेश १, गण्डकी, लुम्बिनी, कर्णाली र सुदूरपश्चिम प्रदेशका थोरै स्थानमा भारी सम्भावना रहेको मौसम पूर्वानुमान महाशाखाले जानकारी दिएको छ। राति प्रदेश १, बागमती, कर्णाली र सुदूरपश्चिम प्रदेशका थोरै स्थानमा भारी वर्षाको आँकलन गरिएको छ।
महाशाखाका अनुसार सोमबार धेरै स्थानमा वर्षाको सम्भावना छ, राति प्रदेश १, बागमती र गण्डकी प्रदेशका एक-दुई स्थानमा भारी वर्षाको पूर्वानुमान गरिएको छ । मंगलबारदेखि मौसममा केही सुधार आउने महाशाखाले जनाएको छ।