काठमाडौं- नेपालमा हुने १३औं दक्षिण एसियाली खेलकुद (साग)को लोगो र मस्कट अंकित व्यानर ‘किलर माउन्टेन’ का नामबाट परिचित मानास्लु हिमालको चुचुरोमा पुर्याइने भएको छ ।
उक्त व्यानर आरोही प्रकाशराज पाण्डेले ८ हजार १ सय ६३ मिटर उचाईको हिमाल मनास्लुको चुचुरोमा लान लागेका हुन् । राष्ट्रिय खेलकुद परिषद् (राखेप) का सदस्य–सचिव रमेशकुमार सिलवालले सफलताको शुभकामना दिदै प्रकाशलाई बिहीबार व्यानर हस्तान्तरण गरे ।
मनास्लुको चुचुरोमा पुर्याएको व्यानरलाई सागको उद्घाटान समारोहमा हस्तान्तरण गर्ने प्रकाशले जानकारी दिए । सेप्टेम्बर तेश्रो साता प्रकाश मनास्लु आरोहण गर्ने तयारीमा छन् ।
रामेछाप निवासी २८ वर्षीय प्रकाशले विश्वको सर्वोच्च शिखर सगरमाथा, अमादब्लम र आईल्यान्ड पिकको १–१ पटक सफल आरोहण गरिसकेका छन् । उनले बडेन पावेल स्काउट पिकको पनि २ पटक सफल आरोहण गरिसकेका छन् ।
प्रकाशित: Dec 31, 2017| 18:23 आइतबार, पुस १६, २०७४