व्यवसायीको ‘बार्गेनिङ’ले दसैंको टिकट बुकिङ अनिश्चित  

काठमाडौं- यातायात व्यवसायीले दसैंको टिकट बुकिङ खोल्न शर्त राखेपछि भदौ २५ गतेदेखि खोल्ने भनिएको दसैंको टिकट बुकिङ अनिश्चित बनेको छ । 

व्यवसायीले टिकट बुकिङ खोल्नुअघि आवश्यक तयारी गर्नुपर्ने र वैज्ञानिकरूपमा भाडा समायोजन गर्नुपर्ने माग गरेपछि बुधबार यातायात व्यवस्था विभाग र यातायात व्यवसायीको वार्ता निश्कर्षमा पुग्ने सकेन । छलफलमा व्यवसायीहरूले २०६९ सालपछि वैज्ञानिक रूपमा भाडा समायोजन नभएकाले जसरी पनि भाडा समायोजन गर्नुपर्ने माग गरेका थिए ।

टिकट बुकिङ अनिश्चित बनेपछि दसैंका लागि घर फर्कने यात्रु अन्योलमा परेका छन् । 

यातायात व्यवसायीले हरेक वर्ष चाडवाडका बेला ‘बार्गेनिङ’ गर्ने गरेको उपभोक्ताकर्मी बताउँछन् । 

विभागले अर्काे साता व्यवसायीसँग छलफल गरी टिकट बुकिङ खोल्ने जनाएको छ । टिकट बुकिङका लागि आवश्यक तयारी र अध्ययन गरेर अर्को साता व्यवसायीसँग छलफल गरिने विभागको योजना छ । विभागले अहिले सञ्चालन भएका रुट, आवश्यक पर्ने सवारी साधनबारे अध्ययन गर्ने जनाएको छ । 

नेपाल यातायात व्यवसायी राष्ट्रिय महासंघका महासचिव सरोज सिटौला व्यवसायीले सरकारसँग आफ्ना समस्या राखेकाले यसलाई बार्गेनिङ भन्न नमिल्ने जिकिर गर्छन्। 

विभागले चाडवाडअघि कुनै पनि हालतमा भाडा समायोजन गर्न नसकिने बताएको छ । सरकारले भाडा समायोजनका लागि समिति बनाएको र त्यसले काम गरिरहेकाले तत्कालै भाडा वृद्धि हुन नसक्ने विभागले जनाएको छ ।