गोली हानेर पर्सा प्रहरीले समात्यो हतियारधारी व्यक्ति

वीरगंज- पर्सा प्रहरीले गोली हानेर एक जना हतियारधारी व्यक्तिलाई नियन्त्रणमा लिएको छ । 

वीरगञ्ज महानगरपालिका वडा नं–१६ बस्ने सन्तोष दासलाई नियन्त्रणमा लिन गोली चलाउनु परेको पर्साका प्रहरी प्रवक्ता अनन्त राज शर्माले जानकारी दिए । वडा प्रहरी कार्यालय श्रीपुरको टोलीले नियमित चेकजाँच गर्ने क्रममा दास भागेपछि नियन्त्रणमा लिन गोली चलाएको उनको दाबी छ । 

चेकजाँचको लागि खटिएको प्रहरीले दासको दायाँ खुटामा गोली हानी नियन्त्रणमा लिएको हो । उनको साथबाट प्रहरीले १७ राउण्ड गोली र एउटा हतियार पनि बरामद गरेको छ । 

उनले प्रहरीलाई नै हतियार देखाई भाग्ने प्रयास गरेका थिए । घाइते दासको वीरगञ्जस्थित नारायणी अस्पतालमा उपचार भइरहेको छ । घटनाको थप अनुसन्धान जारी रहेको प्रहरीले जनाएको छ ।