कांग्रेसले गर्‍यो १४ निर्णय : विस्तृत जानकारी आज गराइने

काठमाडौं- नेपाली कांग्रेस केन्द्रीय कार्य समितिको बैठकले विभिन्न १४ कार्यसूचीमा सहमति जुटाएर निर्णय गरेको छ । 

गत असार २२ गतेदेखि शुरु भएर पटकपटक गरी १६ दिन बसेको बैठकले भ्रातृ एवं शुभेच्छुक संस्थाहरुको विधान संशोधन र मान्यता प्रदान गर्ने, पार्टी, भ्रातृ सङ्घहरुको अधिवेशन गर्ने लगायतका १४ वटा निर्णय गरेको हो । 

बैठकले जनसम्पर्क समितिका सम्बन्धमा, स्थानीय तहमा पार्टीका तर्फबाट निर्वाचित जनप्रतिनिधिलाई नीतिगत निर्देशन दिने, पार्टीको नियमावली, पार्टी विधानअनुसार अन्तरिम संरचना गठन प्रक्रिया अघि बढाउने, क्रियाशील सदस्यता नवीकरण एवं वितरणका विषयमा पनि निर्णय गरेको छ । 

यस्तै बैठकमा पार्टीको पहिलो चरणको राष्ट्रिय जागरण अभियानको प्रतिवेदन प्रस्तुत, केन्द्रीय नीति, अनुसन्धान तथा प्रशिक्षण प्रतिष्ठानद्वारा कार्य प्रगति विवरण प्रस्तुत, अनुशासन समितिको कार्य प्रगति प्रतिवेदन प्रस्तुत, काङ्ग्रेस र तत्कालीन नेपाल लोकतान्त्रिक फोरमका बीच पार्टी समायोजनका विषमया पनि निर्णय गरेको पार्टी प्रवक्ता विश्वप्रकाश शर्माले जानकारी दिए । 

गत असार २२ गतेको केन्द्रीय कार्यसमिति बैठकमा महामन्त्री पूर्णबहादुर खड्काले छलफलका १४ कार्यसूची प्रस्तुत गरेका थिए । निर्णयबारे विस्तृत जानकारी बुधबार (आज) गराइने प्रवक्ता शर्माले बताए ।  

मंगलबारको बैठकमा वरिष्ठ नेता रामचन्द्र पौडेल, उपसभापति विमलेन्द्र निधि, उपसभापति विजयकुमार गच्छदार, महामन्त्री डा शशाङ्क कोइराला, महामन्त्री पूर्णबहादुर खड्का, सहमहामन्त्री डा प्रकाशशरण महत, केन्द्रीय सदस्यहरु गोपालमान श्रेष्ठ, डा रामशरण महत, अर्जुननरसिंह केसी, महेश आचार्य, डा नारायण खड्का, दिलेन्द्रप्रसाद बडूलगायतले आ–आफ्नो धारणा राखेका थिए ।