काठमाडौं– वर्षाका कारण देशका विभिन्न स्थानमा आएको बाढी–पहिरो र डुबानमा परी गएको जेठ ३० गतेदेखि शनिबार दिउँसोसम्म ९१ जनाको मृत्यु भएको छ। मनसुनजन्य घटनामा परी यो अवधिमा १० बालकसहित ५६ पुरुष र १२ बालिकासहित ३५ महिलाको मृत्यु भएको हो।
बाढी–पहिरो र डुबानमा परी यो अवधिमा ११६ जना घाइते भएका छन्। घाइते हुनेमा १४ बालकसहित ७४ पुरुष र १० बालिकासहित ४२ महिला छन्।
यस्तै, बाढी–पहिरोमा परी २८ जना बेपत्ता छन्। चार बालकसहित २१ पुरुष र एक बालिकासहित सात महिला बेपत्ता भएका हुन्।
बाढी–पहिरोमा परेका एक हजार २७५ जनालाई विभिन्न ठाउँबाट उद्धार गरी उनीहरूलाई तत्काल उपचारका लागि विभिन्न अस्पतालमा लगिएको प्रहरीले जनाएको छ।
यो अवधिमा भएका एक हजार १३० वटा विपतका घटनाबाट एक हजार २०९ घरपरिवारका पाँच हजार ९२४ जना मानिस विस्थापित भएको प्रहरीले जनाएको छ।