एजेन्सी- नेदरल्यान्डस् तथा इंग्लिस क्लब लिभरपुलका डिफेन्डर भिर्गिल भान डाइकले युइएफए वर्ष खेलाडीको अवार्ड जितेका छन् । उनले तीन पटक यस अवार्ड जितेका पोर्चुगिज स्टार क्रिस्टियानो रोनाल्डो र दुई पटकका विजेता अर्जेन्टिनी स्टार लियोनल मेस्सीलाई पछि पार्दै वर्ष खेलाडीको अवार्ड जितेका हुन् ।
भान डाइकले पहिलो पटक मोनाकोमा भएको युइएफए च्याम्पियन्स लिगको समूह ड्र समारोहमा उक्त अवार्ड जितेका हुन् । उनले गत सिजन युरोपियन क्लब फुटबलमा उत्कृष्ट प्रदर्शन गरेका थिए ।
उनले लिभरपुललाई च्याम्पियन्स लिगको उपाधि दिलाउन र घरेलु लिगमा दोस्रो स्थानमा रहन महत्वपूर्ण भुमिका खेलेका थिए । त्यस्तै उनले नेदरल्याण्डलाई युइएफए नेसन्स कपको फाइनलमा पुर्याएका थिए ।
सन् २०११ देखि सुरु भएको यस अवार्डको उपाधि रोनाल्डोले ३ पटक जित्दा मेस्सीले दुई, आन्द्रे इनिस्टा, फ्रान्क रिबेरी र लुका मोड्रिचले एक एक पटक जितेका छन् ।
भान डाइकले नै वर्षको उत्कृष्ट डिफेन्डरको उपाधि पनि जित्दा उत्कृष्ट गोलरक्षकको उपाधि लिभरपुलका एलिसन बेकर, उत्कृष्ट मिडफिल्डरको अवार्ड आयाक्सका फ्रानकी डे जोङले जितेका छन् ।
त्यस्तै उत्कृष्ट फरवार्डको उपाधि बार्सिलोना कप्तान लिओनेल मेस्सीले जितेका छन् । महिलातर्फको वर्ष खेलाडी अवार्ड इंग्ल्याण्डकी लुसी ब्रोन्जले जितिन् ।
प्रकाशित: Dec 31, 2017| 18:23 आइतबार, पुस १६, २०७४