काठमाडौं- घरेलु मैदानमा आयोजना भएको एभिसी सेन्ट्रल जोन पुरुष भलिबल प्रतियोगिताबाट नेपाल बाहिरिएको छ । बुधबार भएको खेलमा माल्दिभ्ससँग ३-० को सोझो सेटमा पराजित भएसँगै नेपाल प्रतियागिताबाट बाहिरिएको छ ।
यससँगै घरेलु मैदानमा पहिलो अन्तर्राष्ट्रिय उपाधि जित्ने नेपालको सपना अधुरै रहेको छ । समूहको पहिलो खेलमा प्रतियोगिताकै बलियो टोली कीर्गिस्तानसँग ३-० को सोझो सेटमा पराजित भएको थियो ।
तर, दोस्रो खेलमा मल्दिभ्सलाई सहजै पराजित गर्ने सेमिफाइनलमा स्थान बनाउने लक्ष्य बनाएको नेपाल उल्टो आफु पराजित हुन पुग्यो । पहिलो सेटमा २५-२२ ले गुमाएको नेपालले दोस्रो सेटमा झनै खराव प्रदर्शन गर्यो ।
दोस्रो सेटमा नेपाल २५-२१ मा पराजित हुन पुग्यो । तर, तेस्रो सेटमा नेपाल २५-१४ को फराकिलो अन्तरमा पराजित भएसँगै नेपालको घरेलु मैदानमा उपाधि जित्ने सपना अधुरै रहेको हो । माल्दिभ्ससँगको हारसँगै समूह 'ए' बाट नेपाल जितविहीन बन्दै प्रतियोगिताबाट बाहिरिएको छ ।
नेपालले अंक जोड्न सकेन । अब नेपालले पाँचौ स्थानको लागि समूह 'बी' को तेस्रो हुने टोलीसंग खेल्नेछ । माल्दिभ्स भने समूहको उपविजेता बन्दै सेमिफाइनलमा प्रवेश गरेको छ । माल्दिभ्सले २ खेलमा २ अंक जोड्यो ।
माल्दिभ्सले अब सेमिफाइनलमा समूह 'बी' को विजेता उज्वेकिस्तानसँग खेल्नेछ । यस समूहबाट किर्गिस्तान २ खेलमा २ जितसहित ४ अंक जोडेर समूह विजेताको रुपमा सेमिफाइनल पुगिसकेको छ ।
प्रकाशित: Dec 31, 2017| 18:23 आइतबार, पुस १६, २०७४