काठमाडौं - प्रहरी हिरासतमा रहेका सञ्चारकर्मी रवि लामिछानेकी पत्नी निकिता पौडेलले प्रेस काउन्सिल नेपालका कार्यवाहक अध्यक्ष किशोर श्रेष्ठसहित तीन जना विरुद्ध जाहेरी दिएकी छिन्।
महानगरीय प्रहरी परिसर काठमाडौंमा निकिताले मृतक शालिकराम पुडाशैनीको भिडियो किर्ते गरेको भन्दै जाहेरी दिएकी हुन्। उनले श्रेष्ठसहित नेपालआज अनलाइनका सम्पादक संकेत कोइराला र जिल्ला प्रहरी कार्यालय चितवनका प्रमुख एसपी दानबहादुर मल्लविरुद्ध जाहेरी दिएकी हुन्।
मुलुकी अपराध संहिता २०७४ को दफा २७६ र ७७ अनुसार जाहेरी दर्ता गरेको निकिता पौडेलका अधिवक्ता राजेन्द्र सेढाईले जनाएका छन्।
पत्रकार पुडाशैनीको प्रकरणमा न्यूज २४ का कार्यक्रम सञ्चालक लामिछानेसहित तीन जनालाई प्रहरीले पक्राउ गरी अनुसन्धान गर्दैछ। जिल्ला अदालतले अनुसन्धानका लागि दुई पटक म्याद थप गरेको छ।
प्रकाशित: Dec 31, 2017| 18:23 आइतबार, पुस १६, २०७४