जनकपुरधाम- जिल्ला प्रहरी कार्यालय धनुषा परिसरबाट फरार भएका करणी मुद्दाका फरार अभियुक्त पक्राउ परेका छन् ।
बयान लिने क्रममा मुद्दा शाखाबाट फरार भएका सिरहाका राममणी यादवलाई प्रहरीले पक्राउ गरेको हो ।
गत विहिबार बयान लिने क्रममा फरार भएका यादवसहित पाँचजनालाई प्रहरीले मंगलबार राति सिरहाको माडरस्थित भारतीय सीमाबाट पक्राउ गरेको जिल्ला प्रहरी कार्यालय धनुषाका डिएसपी रामेश्वर कार्कील जानकारी दिए ।
यादवका साथै सिरहा औरहीका प्रमेश यादव, ठैगहीका सूर्यनारायण यादव, बसपिट्टाका राजकुमार यादव र अर्नमानका रामप्रकाश यादवलाई प्रहरीले पक्राउ गरेको छ ।
राममणीसँग सुरुदेखि सम्पर्कमा रहेको देखिएपछि यी चारजनालाई प्रहरीले नियन्त्रणमा लिएको थियो । पक्राउ परेका चारैजना जनकपुरस्थित एक निजी कलेजमा ओभरसियरका विद्यार्थी हुन् ।
पक्राउ परेका पाँचैजनामाथि अनुसन्धान भइरहेको प्रहरीले जनाएको छ । बयान लिने क्रममा प्रहरी हिरासतबाटै राममणी फरार भएपछि जिल्ला प्रहरी कार्यालय धनुषाले असई राजकुमार भण्डारीलाई निलम्बन गरेको छ ।
भण्डारीले लापरबाही गरेको भन्दै उनलाई निलम्बन गरिएको हो । साथै फरार भएका राममणीलाइ खोज्न तथा घटनाको छानबिन गर्न कार्यालयले डिएसपी कार्कीको नेतृत्वमा पाँच सदस्यीय टोलीसमेत गठन गरेको छ ।
जनकपुर–८ बलबा टोलमा डेरा लिएर बस्दै आएका सिरहाका राममणी यादव बालिकालाई जर्बजस्ती करणी गरेको आरोपमा पक्राउ परेका थिए ।
प्रकाशित: Dec 31, 2017| 18:23 आइतबार, पुस १६, २०७४