बिरामीको मृत्युपछि अस्पतालमा तनाव  

धनगढी - शल्यक्रिया गरेका बिरामीको मृत्यु भएपछि धनगढीको निसर्ग अस्पतालमा तनाव उत्पन्न भएको छ। कञ्चनपुरको भीमदत्त नगरपालिका- १२ का ५० वर्षीय मदनसिंह भण्डारीको मंगलवार मृत्यु भएपछि अस्पतालमा तनाव उत्पन्न भएको हो।

सोमवार बिहान ७ बजे पित्तथैलीको शल्यक्रियाका लागि अस्पताल भर्ना भएका उनको दिउँसो २ बजे शल्यक्रिया गरिएको थियो। राती ११ बजे मृत्यु भएपछि आफन्तले अस्पतालमा प्रदर्शन गरिरहेका छन्। चिकित्सकको लापरबाहीले मृत्यु भएको भन्दै आफन्तजले विरोधमा नारावाजी गरेका छन्। 

अस्पताल प्रशासन र मृतकका आफन्तबीच अहिले छलफल चलिरहेको जिल्ला प्रहरी कार्यालय कैलालीका प्रहरी नायव उपरीक्षक दक्षकुमार बस्नेतले जानकारी दिए। घटनाबारे अस्पताल प्रशासनको आधिकारीक धारणा सार्वजनिक गरेको छैन। अस्पताल बन्द छ।