धनगढी- अछामबाट कैलालीतर्फ आइरहेका दुईवटा यात्रुबाहक बसमा डोटीमा आइतबार राति लुटपाट भएको छ । ना ४ ख ७२६९ र ना ५ ख ७१२१ नम्बरको बस डोटीको शिखर नगरपालिका – ६ तल्कोटमा नगद ९० हजार सहित लुटपाट भएको पीडितले जानकारी दिएका छन् ।
लुटपाटका क्रममा बस मालिकसहित तीनजना यात्रु घाइते भएको पीडित तेजबहादुर मल्लले जानकारी दिए । लुटेराको कुटाईबाट उनको कान, टाउको र छातीमा चोट लागेको छ ।
लुटेरा समुहले सुरुमा मल्लकै गाडीमा आक्रमण गरेको बुझिएको छ । गाडी अघि बढ्न खोज्दा पछाडिबाट ढुंगाले प्रहार गरेको मल्लले बताए । ‘ढुङ्गा लागेपछि के भयो भनेर गाडी रोकेर बाहिर निस्केको थिए गाडी रोक भनेको सुन्दैनस् भनेर कानमा मुक्का हाने’ मल्लले भने, ‘त्यसपछि लगातार सबैले भकुरे ।’ पैसा लगेपछि कुट्न पनि छोडे । मल्लको घाँटीमा रहेको सुनको सिक्री तथा सुनको औँठी समेत लुटेर लगेका छन् ।
मल्लको गाडी अगाडि बढेपछि करिव १०–१५ मिनेटपछि अछामबाटै मोहन मल्लको ना ५ ख ७१२१ नम्बर बस पनि उनीहरुले रोकेर ढुंगामुढासहित राति साढे ८ बजेतिर बाटो छेकेर लुटेको घाइते यात्रु अर्जुन कुँवरले बताए । ‘एक्कासी गाडी रोक्न १०÷१२ जनाको समूह आयो, गुरु र साहुलाई सुरुमै नियन्त्रण लिएर हातपात गरे’ अर्जुनले भने– ‘झ्यालबाट बाहिर हेर्ने यात्रुलाई पनि ढुङ्गा हानेर बाहिरबाटै आक्रमण गरे । उनीहरुले साहुको कपडा च्यातेर नगद पैसा लुटेर भागेको कुँवरले सुनाए ।
यसैबीच जिल्ला प्रहरीले लुटपाटमा संलग्न शिखर नगरपालिका – ८ तिलतालीका गोविन्द रावतलाई पक्राउ गरेको छ । नायब प्रहरी उपरीक्षक लालबहादुर धामीले राउत पक्राउ परेको र अन्य लुटेराहरू फरार रहेको र खोजीकार्य भइरहको जानकारी दिए । पीडितले लुट्नकै लागि आक्रमण गरेको बताए पनि प्रहरीले भने लुटपाट नभई भाडाको विषयमा गाडी मालिक र युवाहरूबीचमा विवाद हुँदा बस तोडफोड भएको हुन सक्ने अनुमान गरेको छ ।
प्रकाशित: Dec 31, 2017| 18:23 आइतबार, पुस १६, २०७४