काठमाडौं - नेपाल कम्युनिष्ट पार्टी (नेकपा) का नेता नारायणकाजी श्रेष्ठले पूर्व समूह, गुटगत लेनदेनलाई आधार नबनाएर एकजुट हुन आग्रह गरेका छन्। श्रेष्ठले ट्विट गर्दै पार्टी नीति एवं घोषणापत्रलाई लागु गर्नेगरी सरकारलाई सफल पार्न एकजुट हुन आग्रह गरेका हुन्। एकीकरणका बाँकी काम पुरा गरी एकीकृत संरचनालाइ सक्रिय पार्न, प्रकाशित राजनीतिक प्रतिवेदनका आधारमा बैचारिक- राजनीतिक कार्यदिशालाई एकरुप ढङ्गले प्रशिक्षित गर्न पनि एकजुट आवश्यक रहेको उनले बताएका छन्।
श्रेष्ठले लेखेका छन्, 'अब हामी एकीकरणको बाँकी काम पुरा गरी एकीकृत सँरचनालाइ सक्रिय पार्न,प्रकाशित राजनीतिक प्रतिवेदनका आधारमा बैचारिक- राजनीतिक कार्यदिशालाई एकरुप ढङ्गले प्रशिक्षित गर्न र पार्टी नीति एवं घोषणापत्रलाई लागु गर्नेगरी सरकारलाई सफल पार्न एकजुट होऔं। पुर्बसमुह, गुटगत वा लेनदेनलाई आधार नबनाऔं।'
सत्तारुढ नेकपाले लामो समयको रस्साकसीपछि केन्द्रीय विभागका प्रमुख, उपप्रमुखको शुक्रबार टुंगो लगाएको थियो। प्रधानमन्त्रीको सरकारी निवास बालुवाटारमा शुक्रबार बसेको सचिवालय बैठकले ३२ केन्द्रीय विभागका प्रमुख, उपप्रमुख र २ जना कार्यालय सचिवको जिम्मेवारी बाँडफाँट गरेको थियो। त्यसैगरी केही प्रदेश सह इन्चार्ज पनि थपेको थियो। जसमा श्रेष्ठलाई प्रचार तथा प्रकाशन विभाग प्रमुखको जिम्मेवारी दिइएको छ।
प्रकाशित: Dec 31, 2017| 18:23 आइतबार, पुस १६, २०७४