चेकपोष्ट खण्ड अलपत्र, धुलो र खाल्डाले सास्ती

काठमाडौं– काठमाडौंबाट शनिबार प्रकाशित अधिकांश राष्ट्रिय दैनिकले बिहीबार नेकपाले टुङ्ग्याएको केन्द्रीय विभागहरुको जिम्मेवारी बाँडफाँटको विषयलाई प्राथमिकताका साथ प्रकाशित गरेका छन्। 

यसै विषयलाई नागरिकले ओलीले एकाएक मिलाए दलको विवाद शिर्षकमा समाचार प्रकाशन गरेको छ भने कान्तिपुरले गाँठो फुक्यो शिर्षक दिएको छ। यस्तै अन्नपूर्णले भने गौतमलाई पदै पद पोखरेललाई स्कुल शिर्षकमा समाचार प्रकाशन गरेको छ।
 
नागरिक दैनिकले नै त्रिपुरेश्वर – नागढुंगा सडक : चेकपोष्ट खण्ड अलपत्र धुलो र खाल्डाले सास्ती शिर्षकमा समाचार प्रकाशन गरेको छ। 

त्रिपुरेश्वर–कलंकी–नागढुंगा सडकअन्तर्गत थानकोटस्थित चेकपोस्ट चोकमा सडक निर्माणको काम अलपत्र छाडिएपछि स्थानीय धुलोबाट आक्रान्त बनेका छन्। समयमा पिच हुन नसक्दा स्थानीयसँगै यात्रु धुलोको मारमा परेका हुन्।

ठेकेदार र काठमाडौं उपत्यका सडक विस्तार आयोजनाको ढिलासुस्तीका कारण काम अलपत्र परेको हो। चेकपोस्ट चोकमा फुटपाथको काम नसक्दा सर्वसाधारण खाल्डोमा पर्ने उच्च जोखिम छ ।

सडक निर्माण २०७६ असारमा सक्ने गरी २०७२ सालमा बज्रगुरु/बिरुवा/सिएम जेभी, शर्मा/शैलुङ/कान्छाराम जेभी, लुम्बिनी/शैलुङ/साप जेभी, शर्मा/शैलुङ/कान्छाराम जेभी गरी चार निर्माण व्यवसायी सँग क्रमशः ३९ करोड २९ लाख ६४ हजार, २९ करोड ५५ लाख ३२ हजार, २८ करोड ७९ लाख ९७ हजार र ५४ करोड ६७ लाख ५८ हजारमा ठेक्का सम्झौता भएको थियो। म्याद सकिए पनि अझै काम पुरा हुन सकेको छैन। 

यता काठमाडौं उपत्यका सडक विस्तार आयोजनाको प्रवक्ता विश्व विजयलाल श्रेष्ठले त्यहाँकै स्थानीयले घर नभत्काएकाले सडक निर्माण हुन नसकेको बताए।