ओलीको अवस्था सामान्य, सचिवालय बैठक आज

काठमाडौं – प्रधानमन्त्री केपी शर्मा ओलीको स्वास्थ्य सामान्य रहेको छ। बिहीबार ज्वरो आएपनि अहिले भने उनको स्वास्थ्य अवस्था सामान्य रहेको उनको सचिवालयले जनाएको छ।

ओलीका प्रमुख राजनीतिक सल्लाहकार विष्णु रिमालले प्रधानमन्त्री ओलीको स्वास्थ्य अवस्था ठिक रहेको बताए। उनले सञ्चार माध्यमले भनेजस्तो प्रधानमन्त्रीको स्वास्थ्य अवस्था जटिल नभएको पुष्टि गरे। 

ओली बिरामी भएपछि बिहीबार बस्न नसकेको नेकपाको सचिवालय बैठक आज (शुक्रबार) का लागि बोलाइएको छ। पार्टीका विभाग, केन्द्रीय सदस्यहरूको कार्यविभाजन, एकीकरणको बाँकी कामलगायत विषयमा छलफल गर्न बालुवाटारमा सचिवालय बैठक बोलाइएको हो। नेकपामा स्कुल विभाग विवादमा छ। यसमा सचिवालय सदस्य ईश्वर पोखरेल, प्रवक्ता नारायणकाजी श्रेष्ठ, स्थायी कमिटी सदस्य घनश्याम भुसाल र वेदुराम भुसाललगायतले दाबी गरेका छन्। 

बैठक दिउँसो ३ बजे प्रधानमन्त्री निवास बालुवाटारमा बस्ने भएको छ। बैठक विभिन्न कारण सर्दै आएको छ। सचिवालयको बैठक यसअघि साउन १३ गते बसेको थियो। यसअघि साउन २८ र २९ गते बोलाइएको बैठकसमेत अन्तिम समयमा स्थगित भएको थियो।