आयोगले संसद् पठायो एकीकृत समाजवादी र लोसपा सांसदको विवरण

काठमाडौं- निर्वाचन आयोगले नवगठित दुई नयाँ दलका सांसदको विवरण संसद् सचिवालयमा पठाएको छ। नेकपा एमालेबाट विभाजन भएर माधवकुमार नेपाल नेतृत्वमा बनेको नेकपा (एकीकृत समाजवादी) र महन्थ ठाकुर नेतृत्वको लोकतान्त्रिक समाजवादी पार्टी (लोसपा)का सांसदको विवरण आयोगले संसद् सचिवालयलाई पठाएको हो। 

एकीकृत समाजवादीका ३० र लोसपाका १४ संघीय सांसद रहेको विवरण आयोगले संसद् सचिवालयलाई पठाएको छ। एमालेबाट निर्वाचित थप चार सांसदले पनि एकीकृत समाजवादीमा रहन चाहेको निवेदन दिएको पनि आयोगले संसद् सचिवालयलाई जानकारी गराएको छ। नयाँ दल दर्ताका लागि निवेदन दिँदा हस्ताक्षर नगरेका सोमप्रसाद पाण्डे, माया ज्ञवाली, तुलसा थापा र शारदादेवी भट्ट पनि नेपाल नेतृत्वको एकिकृत समाजवादी  जाने भएका छन्।

संघीय संसदीय दल वा केन्द्रीय समितिमा २० प्रतिशत पुर्‍याए दल विभाजन गर्न पाउने गरी अध्यादेश आएपछि एमाले फुटेर नेकपा एकीकृत समाजवादी र जनता समाजवादी पार्टी फुटेर लोकतान्त्रिक समाजवादी पार्टी बनेको हो। दुबै दललाई निर्वाचन आयोगले ९ भदौमा मान्यता दिएको थियो।