घूस लिएको आरोपमा सहायक वन अधिकृत पक्राउ

धनगढी- नगद सहित एकजना सहायक वन अधिकृतलाई अख्तियारको टोलीले पक्राउ गरेको छ । 

डडेल्धुराको गन्यापधुरा गाउँपालिका–१ भाँतकाँडाबाट सब–डिभिजन कार्यालय बीपीनगर डोटीमा कार्यरत सहायक वन अधिकृत सुरेशचन्द्र डिसीलाई आईतबार साँझ अख्तियारको टोलीले पक्राउ गरेको हो । 

काम गरिदिएबाफत उपभोक्ताबाट रकम लिएको उजुरीका आधार अख्तियार दुरुपयोग अनुसन्धान आयोगको कार्यालय महेन्द्रनगरबाट टोली खटिएको प्रमुख शिव कार्कीले जानकारी दिए । 

उनले घटनाको पूर्ण विबरण भने खुलाउन चाहेनन् । ‘सूचना यही हो । टोली छानविनका क्रममा छ,’ उनले भने,‘ छानविनपछि मात्रै पुरा खबर भन्न सकिन्छ ।’

स्रोतका अनुसार डिएसपीको नेतृत्वमा गएको टोलीले तीनलाख भन्दा बढी नगद सहित सहायक बन अधिकृत डिसीलाई समातेको हो । उनीसंगै रहेका जोरायल गाउँपालिका–१ का किरण मल्लले सो रकम आफ्नो भएको दाबी गरिरहेका छन् ।

 ‘उहाँ (सहायक वन अधिकृत डिसी)लाई फसाउन यस्तो गरिएको हो,’ मल्लले भने, ‘त्यो रकम मेरो हो । कसैले उहाँलाई दिएको होईन् ।’

सहायक वन अधिकृत डिसी पटक पटक घूस लिएको भनेर बिबादमा आउने गरेका थिए । बिगतमा भएका वन फडानीका मुद्दामा पनि लेन देन गरेको आरोप उनीमाथि लागेको थियो । उपभोक्तासंग काम गरिदिएबाफत रकम असुल्ने गरेको सूचना पटकपटक आउने गरेका थिए ।