एजेन्सी– भारतको केरल राज्यमा मुसलधारे वर्षाका कारण आएको बाढी, पहिरो र डुबानमा परी मृत्यु हुनेको संख्या ६० पुगेको छ ।
यहाँ एक सातादेखि लगातार भारी वर्षा भइरहेको छ ।
केरलका १४ जिल्लामा गएको पहिरो र बाढीका कारण १ हजार ३१८ शिविरमा १ लाख ६५ हजार जनताले शरण लिएका छन् ।
अत्यधिक वर्षाका कारण केरलको कोच्चीस्थित अन्तर्राष्ट्रिय विमानस्थल समेत बन्द छ भने रेल सेवा पनि ठप्प छ ।
केरलमा गएको वर्ष पनि बाढी र पहिरोका कारण ४०० भन्दा धेरै व्यक्तिको ज्यान गएको थियो ।
त्यस्तै भारतको दक्षिणी राज्य कर्नाटकमा पनि बाढीका कारण मृत्यु हुनेको संख्या ३१ पुगेको छ ।
कर्नाटकमा बाढी प्रभावित क्षेत्रका साढे तीन लाख जनालाई विभिन्न राहत शिविरमा स्थानान्तरण गराइएको छ ।
राज्य सरकारका अनुरास बाढीका कारण २१ हजार ४३१ घर र साढे चार लाख हेक्टरमा गरिएको खेतीमा क्षति पुगेको छ ।
प्रकाशित: Dec 31, 2017| 18:23 आइतबार, पुस १६, २०७४