काठमाडौं- पर्सा प्रहरीले प्राविधिक शिक्षा तथा व्यवसायिक तालिम परिषद् सिटिईभिटीले सञ्चालन गरेको परीक्षाबाट दुईजना नक्कली विद्यार्थीलाई पक्राउ गरेको छ।
आइतबार वीरगञ्ज महानगरपालिका-१५ स्थित नेशनल मेडिकल कलेजमा सञ्चालन गरिएको प्रविणता प्रमाणपत्र नर्सिङको परीक्षामा परीक्षा दिइरहेका नक्कली विद्यार्थी नियन्त्रणमा लिएको हो।
पक्राउ पर्नेमा रौतहट अमुनिया गाँउपालिका-१ का २२ वर्षीय जोग नारायण यादव तथा गढीमाई गाँउपालिका-६ का २३ वर्षीय कौशल प्रसाद यादव छन्।
जोग नारायण यादवले रौतहट गढीमाई- ६ का वर्ष २२ को छोटेलाल यादवको नाममा परीक्षा दिइरहेको र कौसल प्रसाद यादवले रौतहटकै रमाकान्त साहको नाममा परीक्षा दिइरहेको पर्सा प्रहरीले जनाएको छ।
पक्राउ परेका दुईजनाले जनही दुई लाख ५० हजार लिएर परीक्षामा सहभागी भएको अनुसन्धानबाट खुलेको छ।
प्रकाशित: Dec 31, 2017| 18:23 आइतबार, पुस १६, २०७४