काठमाडौं- कतारमा आयोजना हुने फिफा विश्वकप २०२२ तथा चीनमा आयोजना हुने एसियन कप २०२३ को छनोट अन्तर्गतको पहिलो खेल नेपालले कुवेतमै खेल्ने भएको छ । अखिल नेपाल फुटबल संघ (एन्फा)ले शुक्रबार नेपालले छनोटका पहिला खेल कुवेतमै खेल्ने जानकारी दिएको हो ।
यसअघि उक्त खेल नेपालको घरेलु मैदानमा आयोजना गर्नु पर्ने तय भएको थियो । खेल ५ सेप्टेम्बरमा कुवेत हुने छ । यससँगै कुवेतमा हुने भनिएको नेपालको अवे खेल भने अब घरेलु मैदानमा हुने पक्का भएको छ । नेपाल र कुवेतबीचको दोस्रो खेल नोभेम्बर १९ मा दशरथ रंगशालामा हुनेछ ।
एन्फाले नेपालको एक मात्र अन्तराष्ट्रिय रंगशाला दशरथ रंगशालाको पुननिर्माण कार्य भइरहेकाले एन्फाले सुरुवाती होम खेललाई अवेका आरुपमा खेल्न कुवेत, चाइनिज ताइपेइ र जोर्डनसमक्ष अनुरोध गरेको थियो ।
कुवेतबाहेक चाइनिज ताइपेइ र जोर्डनले सुरुमै अवे खेलको लागि एन्फाको अनुरोध स्वीकारेपनि कुवेतले इन्कार गरिरहेको थियो । तर, शुक्रबार बिहान कुवेतले एन्फाको अनुरोधलाई स्वीकारेको हो ।
योसँगै छनोटको चार वटै खेल नेपालले घरेलु मैदान दशरथ रंगशालामा खेल्ने भएको छ । यसअघि कुवेतसँगको दुवै खेल कुवेतको मैदानमा खेल्ने तालिका बनेपछि नेपालले ३ खेल मात्र घरेलु मैदानमा खेल्ने तय भएको थियो ।
छनोटमा नेपाल समूह ‘बी’ मा रहेको छ । नेपालको समूहमा एसियाली पावर हाउस अष्ट्रेलिया, जोर्डन, कुवेत र चाईनिज ताइपे रहेका छन् ।
प्रकाशित: Dec 31, 2017| 18:23 आइतबार, पुस १६, २०७४