एजेन्सी- नेपाली राष्ट्रिय टोलीका सदस्य सन्दीप लामिछाने सम्मिलित टोरन्टो नेसनल्स क्यानडामा जारी ग्लोबल टि-२० एलिमिनेटरबाट बाहिरिएको छ ।
शुक्रबार भएको खेलमा खराब प्रकाशका कारण खेल १७.१ ओभरमा रोकिएपछि विनिपेग हक्सले डकवर्थ लेविस पद्दतिका आधारमा टोरन्टोलाई २ रनले पराजित गरेको हो ।
यस खेलको सुरुवाती ११ मा नेपाली अलराउन्डर सोमपाल कामी अटाउन सकेका थिएनन् । टोरेन्टोले दिएको २ सय ३९ रनको लक्ष्य पछ्याएको विनिपेगले १७.१ ओभरमा ५ विकेट गुमाउँदै २ सय १ रन जोड्दा खेल रोकियो ।
विनिपेगको लागि जेपी ड्युमिनीले सर्वा्धिक ८५ रनको योगदान दिए । उनले ४१ बलको सामना गर्दै ८ चौका र ५ छक्का प्रहार गरे । सन्नी सोहालले २९ बलमा ३६ रन जोडे ।
कप्तान रियाद एम्रितले १५ बलमा नटआउट ३३ रन जोडे । उनले २ चौका र ३ छक्का प्रहार गरे । क्रिस लिनले २१ रन जोड्दा अन्यले उल्लेख्य योगदान दिन सकेनन् ।टोरेन्टोका लागि सन्दीप लामिछानेले दुई तथा पोलार्ड, गोर्डन र ग्रीनले एक एक विकेट लिए ।
यसअघि टस हारेर पहिले ब्याटिङको निम्तो पाएको टोरन्टोले निर्धा्रित २० ओभरमा ५ विकेटको क्षतिमा २ सय ३८ रन जोडेको थियो । टोरन्टोका लागि हेनरिक क्लासेनले शतक प्रहार गरे ।
क्लासेनले ४९ बलमा ११ चौका र ५ छक्कासहित १ सय ६ रनमा नटआउट रहे । ओपनर रोड्रीगो थोमसले ४० बलमा ७ चौका र ५ छक्कासहित ७३ रन बनाए ।
प्रकाशित: Dec 31, 2017| 18:23 आइतबार, पुस १६, २०७४