लोकसेवा विज्ञापन विरोध आन्दोलनमा प्रहरी हस्तक्षेप (भिडियो/फोटो)

काठमाडौं - लोकसेवा आयोगले गरेको विज्ञापनको विरोधमा विभिन्न संघसंस्थाले मंगलबार भृकुटी मण्डपबाट निकालेको मौन जुलुसमा प्रहरीले हस्तक्षेप गरेको छ।

गत जेठ १५ गते लोक सेवा आयोगले ५१५ वटा स्थानीय तहका विभिन्न पदपूर्ति गर्न विज्ञापन गरेको थियो। उक्त विज्ञापनमा समावेशी र समानुपातिक सिद्धान्तलाई बेवास्ता गरिएको भन्दै विभिन्न संघ–संगठनले सुरु गरेको आन्दोलन अन्तर्गत मंगलबार अपराह्न भृकुटी मण्डपदेखि शान्तिबाटिकासम्म मौन जुलुस प्रदर्शन गर्ने कार्यक्रम थियो।

तर, भृकुटी मण्डपमै जुलुसमाथि प्रहरीले हस्तक्षेप गरी तितरवितर पारेको छ।

उक्त विज्ञापन खारेज गर्न माग गर्दै परेको रिटमा सुनुवाई गर्दै सर्वोच्च अदालतले उक्त विज्ञापन रोक्न नमिल्ने आदेश दिइसकेको छ। आन्दोलनमा आदिवासी जनजाति महासंघ, तराई मधेश राष्ट्रिय परिषद् लगायतका संघसंस्थाहरुको संलग्नता छ।

भिडियो