धनगढी- अविरल वर्षापछि आएको बाढीले कञ्चनपुरको दक्षिणी क्षेत्रका एक सय बढी घर डुबानमा परेका छन्। दोदा नदीमा आएको बाढी वस्तीमा पसेपछि जिल्लाको बेलौरी नगरपालिका, पुनर्वास नगरपालिका र लालझाँडी गाउँपालिकाका एक सय ८० घर डुबानमा परेका हुन्।
बाढीका कारण मानवीय क्षति नभए पनि घरमा भण्डारण गरिएको खाद्यान्न, लत्ताकपडा पानीले बगाएको छ। लालझाँडी गाउँपालिकाका अध्यक्ष मदन बडायकले बाढीले पालन गरेको माछा बगाएको बताए।
ईलाका प्रहरी कार्यालय त्रिभुवनवस्तीका प्रहरी निरीक्षक कैलाशसिंह बिष्टले डुबानमा परेकाहरुलाई नेपाल र सशस्त्र प्रहरीले उद्धार गरेर सुरक्षिततर्फ लगिरहेको बताए। उनले क्षतिको वास्तविक विवरण आउन समय लाग्ने बताए। यस्तै, बाढीका कारण धनगढी–पुनर्वास जोड्ने सडक अवरुद्ध भएको छ।