नेकपा पार्टी कार्यालयबारे संसदमा चर्चा : प्रतिष्ठा जोगाउन सुझाव

काठमाडौं - सत्तारुढ नेपाल कम्युनिस्ट पार्टी (नेकपा) ले नियम मिचेर सार्वजनिक जग्गा प्रयोग गरेको विषय संसदमा उठेको छ। प्रतिनिधिसभाको मंगलबारको बैठकमा प्रमुख प्रतिपक्षी दल नेपाली कांग्रेसकी सचेतक पुष्पा भुसालले नेकपालाई प्रतिष्ठा जोगाउन सुझाव दिएकी छिन्।

‘सत्ता पक्षलाई चैन अरुलाई ऐन त्यो दृष्टान्त देखियो’, सांसद भुसालले भनिन्, ‘संस्थालाई सार्वजनिक जग्गा भोगाधिकारका लागि दिइएको थियो। तर सार्वजनिक जग्गालाई नियम कानुन मिचेर सत्तारुढ नेकपाले भोग गरेको कुरा उठेको छ।’

प्रमुख प्रतिपक्षीको प्रतिष्ठाको चिन्ता नलिन आग्रह गर्दै उनले नेकपालाई प्रतिष्ठा जोगाउन सुझाव दिइन्।

पासाङ्गलामु शेर्पाको प्रतिष्ठानलाई दिइएको सार्वजनिक जग्गामा नियम मिचेर नेकपाले पार्टी कार्यालय सञ्चालन गरेको छ।