काठमाडौं– पूर्वमन्त्री तथा नेपाली कांग्रेसका नेता मोहम्मद अफ्ताब आलमको मुद्दाको पेसी पुनः सरेको छ। आज शुक्रबारका लागि तोकिएको पेसीमा सुनुवाइ हुन नसकेको हो। उनको मुद्दाको पेसी १५ दिन पछि सरेको छ।
सर्वोच्च अदालतले आलमको मुद्दा न्यायाधीशद्वय प्रकाशमानसिंह राउत र प्रकाशकुमार ढुंगानाको इजलासमा तोकेको थियो।
विपक्षीका कानुन व्यवसायीले सुनुवाइ स्थगितको माग गरे अनुसार आजको सुनुवाइ हुन नसकेको हो। रौतहटको इँटा भट्टामा मानिस जलाएर मारेको अभियोगमा पुर्पक्षका लागि थुनामा रहेका उनले त्यसको विरुद्ध निवेदन दिएका थिए।
२६ असोज ०७६ मा आलम पक्राउ परेका थिए। जिल्ला अदालत रौतहटको आदेशपछि आलम अहिले पुर्पक्षका लागि नक्खु कारागारमा छन्।