डेंगु नभएका विरामीलाई डेंगु लागेको रिपोर्ट

इटहरी- इटहरी र धरानमा डेंगुको त्रास अझै कायम छ। सामान्य रुघाखोकी लाग्नासाथ स्थानीयहरु डेंगुको परीक्षण गराउन स्वास्थ्य संस्थामा जाने गरेका छन्। यस्तै गरे इटहरीका युवा रेवती निरौलाले पनि।

निरौलालाई साउन १६ गतेदेखि सामान्य रुघाखोकी र ज्वरो आयो। त्यसपछि  उनी डेंगु भए नभएको बुझ्न इटहरीमा रहेको इटहरी मेडिकल एन्ड स्वाथ्य उपचार क्लिनिक पुगे। रगत जाँच गराउँदा रिर्पोटमा उनमा डेंगुको संक्रमण भएको भनियो।

निरौलाले डेंगु भएको कुरामा विश्वास गरेनन् र सोही दिन साँझ ६ बजे इटहरी अस्पतालमा पुनः रगत परीक्षण गराए। अस्पतालको रिपोर्टमा डेंगु देखिएन।

सरकारी अस्पतालमा जचाँउदा डेंगु नदेखिनु र निजी क्लिनिकमा देखिनुले निरौला अलमलमा परे। निरौलाले १८ गते पुनः इटहरी मेडिकलमा गएर फेरि रगत परीक्षण गराए। यसपाली रिपोर्टमा डेंगु देखिएन।

एउटै क्लिनिकबाट दुईखाले रिपोर्ट आएपछि निरौलाले क्लिनिकका बरिष्ठ डाक्टर संजय कुमार राठीसँग कुरा गरे।

ल्याब रिपोर्ट भन्दा लक्षणहरु हेरेर आफूले उपचार गराउने बताएका राठीलाई उधृत गर्दै निरौलाले भने, ‘कहिलेकाँही गलत रिपोर्ट आउँछ। पहिले पनि आएको थियो। अरु ल्याबहरुमा पनि आउँछ। यो भन्दा गम्भिर प्रकृतिको चेकजाँचमा पनि गलत रिपोर्ट आएका उदाहरण छ।’

यता, इटहरी मेडिकल क्लिनिकमा म्यानेजर देबेन्द्र बस्नेतले भने मेडिकल किटका कारणले केही समस्या भएर फरक रिपोर्ट आएको बताए। 

बस्नेतले भने, ‘अन्य रिपोर्ट मेसिनबाट आउँछ भने डेंगुको रिपोर्ट कार्डबाट आउँछ। त्यो कार्डमा सामान्य कमजोरी हुँदा डेंगु नभए पनि भएको रिपोर्ट आएको हुनसक्छ।’