विहीबार, साउन २२, २०७७

समाचार

यस्ता छन् ओली सरकारका ६ नयाँ सारथी

1574400383Mantr-New-oli.jpg

काठमाडौं- लामो समयको रस्साकस्सीपछि प्रधानमन्त्री केपी शर्मा ओलीले बुधबार मन्त्रीमण्डल पुनर्गठन गरे । मन्त्रिपरिषदमा ६ जना मन्त्री  थपिएका छन् ।

६ जनामध्ये दुई जनाको सिंहदरवार यात्रा पहिलो हो भने बाँकी चारजना यसअघि पनि मन्त्री भइसकेका राजनीतिज्ञ हुन् ।

कुन मन्त्री कस्ता ?

हृदयेश त्रिपाठी (संघीय मामिला तथा सामान्य प्रशासनमन्त्री)

बहुदलको आगमनसँगै नेपाल सद्भावना पार्टीबाट राजनीतिमा देखिएका त्रिपाठी पटकपटक सांसद भएका छन् भने ४ पटक मन्त्री बनेका छन् । यसअघि २०५४ मा वनमन्त्री, २०६३ मा उद्योग, वाणिज्य तथा आपूर्ति र २०६८ मा भौतिक योजना मन्त्री बनेका थिए उनी ।

तीन पटक मन्त्री भए पनि उनको कार्यकालमा सम्झन लायक खासै काम भएका छैनन् । सद्भावना, तमलोपा हुँदै अहिले नेकपा निकट पुगेका त्रिपाठी २०७४ को चुनावमा नवलपरासी–५ बाट तत्कालीन नेकपा एमालेको सूर्य चिन्ह लिएर विजयी भएका थिए ।

मधेश केन्द्रित राजनीतिज्ञका रुपमा आफ्नो पहिचान बनाए पनि त्रिपाठी राजनीतिको शुरुवाती कालमा भने वामपन्थी थिए । ०३० को दशकमा उनी केशरजंग रायमाझी समूहको एउटा हाँगोको कम्युनिस्ट कार्यकर्ता थिए । उनले तत्कालीन विद्यार्थी फेडरेशनमा रहेर पनि काम गरेका थिए।

घनश्याम भुसाल (कृषि तथा पशुपन्छी मन्त्री)

नवनियुक्त मन्त्री भुसाललाई बौद्धिक नेताका रुपमा चिनिन्छ । नेकपामा उनले स्कुल विभाग प्रमुखका दाबेदार थिए तर, ईश्वर पोखरेलले उक्त विभाग हात पारे । मार्क्र्सवादका व्याख्याता भुसालको यो दोस्रो सिंहदरबार यात्रा हो ।

अनेरास्ववियुबाट राजनीतिक यात्रा थालेका भुसाल यसअघि झलनाथ खनाल नेतृत्वको सरकारमा प्रधानमन्त्री तथा मन्त्रिपरिषद् कार्यालय हेर्ने गरी मन्त्री भएका थिए ।

प्रधानमन्त्री ओलीका आलोचकका रूपमा चिनिएका भुसाल २०७४ को प्रतिनिधिसभा चुनावमा तत्कालीन एमालेका तर्फबाट रुपन्देही–३ बाट विजयी भएका हुन् ।

लेखराज भट्ट (उद्योग, वाणिज्य तथा आपूर्तिमन्त्री)

माओवादी विद्रोहमा शुरुदेखि नै सहभागी भट्ट सुदूरपश्चिमका प्रभावशाली नेता मानिन्छन् । २०७४ सालको प्रतिनिधिसभाको चुनावमा कैलाली क्षेत्र नम्बर–४ बाट विजयी भएका उनको सिंहदरवार यात्रा पहिलो भने होइन ।

उनी यसअघि डा बाबुराम भट्टराई नेतृत्वको मन्त्रिपरिषदमा वाणिज्य तथा आपूर्तिमन्त्री थिए भने त्यसअघि पुष्पकमल दाहाल प्रचण्ड पहिलो पटक प्रधानमन्त्री हुँदा श्रममन्त्री बनेका थिए । त्यतिखेरको उनको काम कारबाही औसत थियो ।

रामेश्वर राय यादव (श्रम, रोजगार तथा सामाजिक सुरक्षामन्त्री)

तत्कालीन माओवादी केन्द्रबाट सर्लाही–३ को चुनाव जितेका यादव यसअघि तीन पटकसम्म मन्त्री भइसकेका छन् ।

उनी पहिलो पटक २०५२ सालमा कानुनमन्त्री भएका थिए  भने दोस्रो पटक २०५३ सालमा वन मन्त्री भएका थिए । त्यसपछि पनि दुई पटक उनी मन्त्री भएका छन् ।

२०५३ मा यादव वनमन्त्री हुँदा राष्ट्रिय जनता पार्टीका वर्तमान संयोजक राजेन्द्र महतो उनका स्वकीय सचिव थिए । बारम्बार मन्त्री भए पनि उनले उल्लेख्य काम गर्न सकेका छैनन् ।

वसन्तकुमार नेम्वाङ (भौतिक पूर्वाधार तथा यातायातमन्त्री)

नेकपाका पुराना कम्युनिष्ट नेताका रुपमा चिनिन्छन् नवनियुक्त मन्त्री नेम्वाङ । पाँचथर घर भएका नेम्वाङ २०४८ र २०५६ सालमा समेत सांसद भए पनि मन्त्री हुने अवसर भने पहिलो पटक पाएका हुन् ।

पार्वत गुरुङ (महिला, बालबालिका तथा ज्येष्ठ नागरिकमन्त्री)

२०७४ सालको चुनावमा दोलखाबाट निर्वाचित भएका गुरुङको यो पहिलो सिंहदरवार यात्रा हो । यसअघि २०७० सालको दोस्रो संविधानसभा चुनावमा तत्कालीन एमालेबाट विजयी भएका थिए ।

मन्त्री हुनु एक महिनाअघि मात्र गुरुङ कर्तव्य ज्यान उद्योग मुद्दामा काठमाडौं जिल्ला अदालतमा उपस्थित भई साधारण तारेखमा रिहा भएका थिए ।

स्थानीय तह निर्वाचनमा दोलखाको गौरीशंकर गाउँपालिका– १ मा नेकपा एमालेबाट वडा सदस्य उम्मेदवार कुलबहादुर तामाङको हत्यापछि उत्पन्न विवादबाट भएको झगडामा गुरुङ मुछिएका हुन् । यही मंसिर २४ गते उनको मुद्दाको पेशी छ।

यी ६ मन्त्रीसँगै प्रधानमन्त्री केपी शर्मा ओलीले तीन जना राज्यमन्त्री नियुक्त गरेका छन् । मोतीलाल दुगड (उद्योग, वाणिज्य तथा आपूर्ति) नवराज रावत (स्वास्थ्य तथा जनसंख्या) र रामवीर मानन्धर (सहरी विकास राज्यमन्त्री) थपिएका हुन् ।

प्रधानमन्त्रीले मन्त्रिमण्डल पुनर्गठन गरेर पनि औसत व्यक्तिलाई अवसर दिएको वरिष्ठ पत्रकार तथा विश्लेषक हरिहर विरही टिप्पणी गर्छन् । उनी भन्छन्- ‘ओलीले राम्रो अवसर पाएका थिए । तर, सही तरिकाले प्रयोग गर्न सकेनन् । फेरि पनि मन्त्री छान्दा आशा गरिएका पात्रलाई रोजेनन् ।’

नयाँ मन्त्रीका रुपमा भित्रिएका पात्रहरुमध्ये अधिकांश पहिला पनि मन्त्री भएकाहरु छन् । जसको प्रदर्शन औसत थियो । काम गर्न सकेनन् भनेर फालिएका मन्त्री भन्दा खास गतिलो काम गरेको रेकर्ड नयाँ भित्रिएका मन्त्रीको पनि देखिँदैन ।

प्रतिक्रिया दिनुहोस्