इजिप्टमा सवारी दुर्घटना, १९ जनाको मृत्यु 

इजिप्ट - इजिप्टको राजधानी कायरोमा गाडीहरू ठोक्किँदा भएको विस्फोटमा कम्तीमा १९ जनाको मृत्यु भएको छ। आइतबार राति कायरोको एक अस्पताल अगाडि भएको घटनामा अन्य ३० जना घाइते भएको बताइएको छ।

त्यो दुर्घटना वा आक्रमण के हो भन्ने बारेमा आधिकारिक रुपमा पुष्टि भइसकेको छैन। अधिकारीहरूका अनुसार गलत दिशामा गुडिरहेको एउटा कारले अन्य तीन गाडीहरूलाई ठक्कर दिँदा सो दुर्घटना भएको थियो।

घटनामा भएको आगलागीका कारण वरपरका घरहरूलाई खाली गराइएको थियो। स्वास्थ्य मन्त्रालयका अनुसार नजिकैको अस्पतालबाट दर्जनौँ  बिरामीहरूलाई अन्य अस्पतालमा सारिएको छ। मन्त्रालयले घाइतेहरू मध्ये केहीको अवस्था चिन्ताजनक रहेको बताएको छ।