भारतबाट यसरी काठमाडौं भित्रिन्छ लागूऔषध   

काठमाडौं- अनौठो शैलीमा काठमाडौंतर्फ ल्याउन लागिएको लागूऔषध पर्सा प्रहरीले बरामद गरेको छ।

लागूऔषधको ओसारपसार हुने मुख्य नाका वीरगंजबाट पर्सा प्रहरीले सोमबार बिहान एक भारतीय नागरिकलाई नियन्त्रणमा लिएको हो।

पक्राउ परेका २० वर्षका महन्थ रामको साथबाट लागूऔषध नुर्फिम एक सय थान, फेनार्गन एक सय थान, डाईजेल्याब एक सय थानसहित पर्सा प्रहरीले नियन्त्रणमा लिएको छ।

उनी सोमबार बिहान ८ बजे वीरगंज–१६ स्थित जयन्ती चोकबाट पक्राउ परेका हुन्। 

प्रहरीले गरेको नियमित चेकजाँजमा पैदलयात्री युवक रामले कम्मर तथा खुट्टामा पेटी बनाई भारतबाट नेपालमा लागूऔषध भित्र्याउदै गरेको अवस्थामा पर्सा प्रहरीले नियन्त्रणमा लिएको हो।

जिल्ला प्रहरी कार्यालय पर्साका प्रमुख एसपी सोमेन्द्र सिंह राठौरका अनुसार पक्राउ परेका भारतीय नागरिक महन्थ रामले उक्त लागूऔषध काठमाडौ लैजान लागेको बताएको छन्।

खुला सीमानाको फाइदा उठाउँदै लागुऔष कारोबार फरक फरक शैलीमा लागूऔषध नेपाल भित्र्याउन थालेका छन्। वीरगंज लागुऔषधको बढी कारोबार हुने नाका हो।

फरक शैलीमा नेपाल भित्रिएको लागूऔषध सहित पक्राउ परेका रामको बिस्तृत अनुसान्धन भैरहेको जिल्ला प्रहरी कार्यालय पर्साले जनाएको छ।

रामसँगै  काठमाडौमा रहेका अन्य लागूऔषध कारोबारको जालो पत्ता लगाउने उदेश्यले पर्सा प्रहरीले  विस्तृत अनुसन्धान सुरु गरेको छ।