भारत प्रशासित कश्मीरमा पूर्व मूख्यमन्त्रीसहित कैयन नेताहरुलाई राज्य सरकारले नजरवन्द गरेको छ ।
श्रीनगर शहरमा मानिसहरुलाई भेला हुन, हिडडुल गर्न रोक लगाइएकोे छ भने जम्मुमा स्थानीय प्रशासनले कर्फ्यू आदेश जारी गरेको छ ।
आतंकवादी आक्रमणको आशंका, भारत पाकिस्तान सीमा रेखामा बढ्दो तनाव र सुरक्षाबलको तैनाती बढाइएका कारण भारत कश्मिरमा तनावको स्थिति बनेको छ ।
पूर्व मुख्यमन्त्री उपर अब्दुल्ला र महबुबा मुफ्ती सहित राज्यका अन्य ठूला नेताहरुमध्ये कसैलाई घरमै नजरवन्द त कसैलाई गिरफ्तार गरिएको छ ।
भारतीय समाचार एजेन्सी पीटीआईका अनुसार कश्मीरमा मोबाइल फोन र इन्टरनेट सेवा बन्द गरिएको छ ।
अहिले प्रधानमन्त्री नरेन्द्र मोदीको आवासमा मन्त्रिपरिषदको बैठक बसिरहेको र कुनै महत्वपूर्ण निर्णय आउनसक्ने भारतीय सञ्चारमाध्यमहरुले उल्लेख गरेका छन् ।
कश्मीर प्रशासनले गएको शुक्रबार अमरनाथ यात्रामा गएका यात्री र पर्यटकलाई तुरुन्त कश्मीरबाट बाहिरिन सुरक्षा निर्देश गरेपछि कश्मीरमा जारी अन्यौल र तनाव अहिले झन् बढेको छ ।
प्रकाशित: Dec 31, 2017| 18:23 आइतबार, पुस १६, २०७४