काठमाडौं - दोलखाको गौरीशंकर गाउँपालिकामा भिषण पहिरो जाँदा करिब एक दर्जन घर पुरिएका छन्। शुक्रबार राति आएको पहिरोमा परी दुई जना सम्पर्कविहीन भएका छन् । बेपत्ता हुनेमा जगतबहादुर खत्री र निसान खड्का रहेका जिल्ला प्रहरी कार्यालय दोलखाले जनाएको छ।
पहिरो आएपछि केहीले भने भागेर ज्यान जोगाएका थिए। पहिरोका कारण केही विस्थापित भएका छन् भने केहीले जोखिमका कारण घर छोडेका छन्।
पहिरोग्रस्त क्षेत्रमा उद्धारका लागि अहिले सुरक्षाकर्मीसहित स्थानीय खटेका छन्। खोलामा बाढी आएको र विभिन्न ठाउँमा पहिरो गएकाले प्रहरीको टोली प्रभावित ठाउँमा पुग्न पनि कठिनाइ भएको छ।
प्रकाशित: Dec 31, 2017| 18:23 आइतबार, पुस १६, २०७४