बजारमा नक्कली १ हजारका नोट छ्यापछ्यापती

धनगढी- नेपाली एक हजार रुपैयाँका नक्कली नोट बजारमा छ्यापछ्यापती भेटिन थालेको छ। पछिल्लो पटक  कैलाली जिल्लाका दुई स्थानमा एकै दिन नक्कली नोट भेटिएका छन् । 

विशेषगरी रातिका समयमा अपरिचित व्यक्ति पसलमा सामान किन्ने क्रममा झुक्याएर एक हजारको नक्कली नोट भिडाउने  गरेको पाइएको छ । मंगलबार राति जिल्लाको कैलारी गाउँपालिका–२ मण्डीस्थित दयाशंकर चौधरीको होटलबाट एक नक्कली नोट फेला परेको  छ । 

रातिको समयमा पसलमा आएको अपरिचित ग्राहकले नक्कली एक हजारको नोट दिएको चौधरीले बताएका छन्  । 

नक्कली नोट फेला परेपछि गाउँपालिकास्थित विभिन्न स्थानमा प्रहरीले नक्कली नोट देखाउँदै सार्वसाधारणलाई सचेत गराउन थालेको ईलाका प्रहरी कार्यालय हसुलियाका प्रहरी नायव निरीक्षक रामचन्द्र पन्तले जनाए ।

पैसाको कारोबार गर्दा राम्ररी पहिचान गरेर मात्रै कारोबार तथा लेनदेन गर्न अनुरोध गर्दै नक्कली नोटवारे ठाउँ–ठाउँमा सचेतीकरण गराइरहेको पन्तले बताए ।

धनगढीमा पनि नक्कली नोटहरु भेटिएका छन् । बुधबार सक्कली जस्तै देखिने एक हजारको नक्कली नोट धनगढीको पिपल चौतारास्थित तरकारी पसलमा फेला परेको छ ।

प्रहरीका अनुसार नक्कली नोट सक्कली भन्दा सानो छ । भने चौडाई पनि कम छ । सुरक्षाका लागि नोटमा राखिने धागो नक्कली छ । सामान्यतः नोटमा कागजको गुणस्तर, धागो, पानी छाप हेरेर सक्कली हो वा नक्कली भनेर छुट्ट्याउन सकिने हुन्छ ।

तर कारोबारीहरुले रातिको समयमा झुक्याउने हुुँदा राम्ररी पहिचान गरेर मात्रै लेनदेन गर्न प्रहरीले अनुरोध गरेको छ । केही दिन पहिले मात्र एक सय दरका ४० हजार नौ सय भारतीय नक्कली नोटसहित दुई भारतीय नागरिक धनगढीमा पक्राउ परेका थिए ।