काठमाडाैं- विपक्षी नेपाली कांग्रेस र राजपाले प्रतिनिधि सभाको बुधबार (आज)को बैठक पनि अबरुद्ध गरेका छन् ।
सर्लाही घटनाबारे छानबिन गर्न संसदीय समिति गठनको माग गर्दै कांग्रेस र राजपा सांसदहरु नाराबाजी गरेपछि संसद् बैठक अवरुद्ध भएको हो ।
बैठकको सुरुमै प्रमुख प्रतिपक्ष दल काँग्रेस र राजपाका सांसदहरु उठेर बेल घेर्न पुगेका थिए । उनीहरुले संसदमा नारावाजी समेत गरेका छन् ।
सांसदहरुले ‘संसदीय सर्वोच्चता कायम गर, संसदीय छानवीन समिति गठन गर, निर्मला पन्तका हत्यारालाई कारवाही गर’जस्ता नारा लगाएका छन् ।
सभामुख कृष्णबहादुर महराले विरोधबारे सरकार र आफूलाई जानकारी भइसकेको भन्दै बस्न अनुरोध गरेका थिए । तर, सभामुखको आग्रहलाई वेवास्ता गर्दै सांसदहरुले नाराबाजी गरेका थिए ।
कांग्रेस र राजपाका सांसद्हरुले करिब १ घण्टा नाराबाजी गरेपछि सभामुख महराले संसद् बैठक बिहीबार दिउसो २ बजेसम्मका लागि स्थगित गरेका छन् ।
यसअघि सोमबार पनि विपक्षी दलहरुले संसद् बैठक अवरुद्ध गरेका थिए । सर्लाही घटनाबारे छानबिन गर्न संसदीय समिति गठन नभएसम्म संसद् चल्न नदिने उनीहरुको अडान छ ।
प्रकाशित: Dec 31, 2017| 18:23 आइतबार, पुस १६, २०७४