विप्लव समुहले बन्दसँगै जलायो ट्रक र कार

मकवानपुर- नेत्रविक्रम चन्द 'विप्लव' नेतृत्वको नेकपाले मकवानपुरका दुई स्थानमा गाडी जलाएका छन्।

विप्लव समूहले आव्हान गरेको बन्दको पूर्वसन्ध्यामा मंगलबार राति मकवानपुरको फाखेल हुमाने भन्ज्याङमा बा१४च ८२३४ नंको कार र मकवानपुरको मनहरी ज्यामिरे खरङ्गामा बा५ख १७३९ नंको ट्रकमा आगजनी गरेका जिल्ला प्रहरी कार्यालय मकवानपुरका प्रहरी उपरीक्षक मुकेशकुमार सिंहले जानकारी दिए।

कार पूर्णरूपमा जलेको छ भने ट्रकको अगाडिको भाग मात्र जलेको उनले बताए।

यसैगरी हेटौंडाका विभिन्न स्थानमा शङ्कास्पद वस्तु फेला परेका छन्। हेटौंडाको थानाभर्‍याङ, चौकीटोल र हुप्राचौर क्विक २० पार्टीप्यालेस नजिकै शङ्कास्पद वस्तु भेटिएको प्रहरीले जनाएको छ।

सबै शङ्कास्पद वस्तु नेपाली सेनाको बम डिस्पोजल टोलीले निस्क्रिय गरिसकेको जनाइएको छ।