काठमाडौं- प्रमुख प्रतिपक्षी नेपाली कांग्रेस र प्रतिपक्षी राष्ट्रिय जनता पार्टी (राजपा) नेपालले आजको प्रतिनिधि सभा बैठक अवरुद्ध गर्ने तयारी गरेका छन् ।
सर्लाही घटनाको संसदीय छानविन समिति गठन र मधेश–थरुहट आन्दोलनको प्रतिवेदन सार्वजनिक लगायतको माग राखी कांग्रेस र राजपाले संसद अवरुद्ध गर्दै आएका छन् ।
आज दिउँसो १ बजेका लागि बोलाइएको बैठक अघि सहमति नभए बैठक अवरुद्ध गर्ने राजपा अध्यक्ष मण्डलका संयोजक राजकिशोर यादवले जनाएका छन्।
प्रहरीको गोलीबाट मारिएका सरोजनारायण सिंह र विप्लव समूहका नेता कुमार पौडेलेका घटना छानविनका लागि दुबै दलले संसदीय समितिको माग गर्दै आएको छ। तर, सत्तारुढ दलले संसदीय समिति गठन नगर्ने पक्षमा देखिएको छ।
यसैगरी विगत एक वर्षदेखि राजपाले मधेश थरुहट आन्दोलनको प्रतिवेदन सार्वजनिक गर्न माग गर्दै आएको छ।
प्रतिवेदन सार्वजनिक गर्ने विषयमा सभामुख कृष्णबहादुर महराले सरकारलाई तीन पटक रुलिङ्ग गरिसकेको छ। तर पनि सरकारले प्रतिवेदन सार्वजनिक नगरेको भन्दै राजपा आक्रोसित बनेको छ।
प्रकाशित: Dec 31, 2017| 18:23 आइतबार, पुस १६, २०७४