फेरि चिर्पटले हानेर छोराले गरे बाबुको हत्या    

धनगढी- कैलालीमा एक छोराले चिर्पटले हानेर बाबुको हत्या गरेका छन् ।

कैलालीको गोदावरी नगरपालिका–५ र्बबाटामा आइतबार राति छोरोले दाउराको चिर्पटले हानेर आफ्नै बुवाको हत्या गरेका हुन् । 

३० बर्षका छोरा राम सिंह कुमालले दाउराको चिर्पट प्रहार गर्दा आफ्नै बुवा ६० वर्षीय अम्मर सिह कुमालको मृत्यु भएको जिल्ला प्रहरी कार्यालय कैलालीले जनाएको छ । रातिको समयमा समान्य घरायसि विवाद भएपछि छोरोले बुवामाथि चिर्पट प्रहार गरेका थिए ।

चिर्पट प्रहारवाट गम्भिर घाईते भएका  कुमालको सेती अञ्चल अस्पतालमा उपचारकै क्रममा मृत्यु भएको हो । बाबुको हत्या गरी फरार रहेका रामसिंहलाई दुई घण्टापछि प्रहरीले नियन्त्रणमा लिएको जिल्ला प्रहरी कार्यालय कैलालीका प्रहरी प्रमुख प्रहरी उपरिक्षक सुदिप गिरिले जानकारी दिए ।

हत्या गरी फरार रहेका उनलाई गोदावरी नगरपालिका-१ को धनगढी रोडको सब्जीमण्डी नजिकै लुकेर बसेको अबस्थामा पक्राउ गरिएको उनले जानकारी दिए ।

घटना बारे थप अनुसन्धान भैरहेको प्रहरीले जनाएको छ । केही दिन पहिले पनि घोडाघोडी नगरपालिकामा एक छोराले चिर्पट प्रहार गरि बाबुको हत्या गरेका थिए ।