काठमाडौं- आज विश्व बाघ दिवस । ‘पर्यापयर्टन प्रवद्र्धनका लागि बाघ संरक्षण’ भन्ने नाराका साथ नेपालमा पनि विविध कार्यक्रम गरी दिवस मनाइँदै छ ।
दिवसको राष्ट्रिय निकुञ्ज तथा वन्यजन्तु संरक्षण विभागले बर्दियामा विशेष कार्यक्रम गरिदैँछ भने पर्सा, चितवन लगायतका ठाउँमा पनि कार्यक्रम आयोजना गरिएको छ ।
सन् २०१० मा नेदरल्यान्ड्सको सेन्ट पिटर्सवर्गमा भएको बाघ सम्मेलन सन् २०२० सम्ममा दुर्लभ पाटे बाघको सङ्ख्या दोब्बर बनाउने घोषणा गरेको थियो । त्यही बेलादेखि अंग्रेजी पात्रो अनुसारको जुलाई २९ मा विश्व बाघ दिवस मनाउन थालिएको हो ।
यस्तो छ बाघको अवस्था
पछिल्लो आँकडाअनुसार नेपालमा बाघको संख्या २३५ वटा छ । चितवन राष्ट्रिय निकुञ्जमा ९३, बर्दियामा ८७, बाँकेमा २१, पर्सामा १८ र शुक्लाफाँटामा १६ वटा बाघ छन् ।
बाघ बढेसँगै बाघ पाइने क्षेत्र विस्तार गरिएको छ । जसअनुसार सन् २०१० मा चारवटा मात्र बाघ रहेको पर्सा निकुञ्जमा यतिबेला १८ वटा बाघ छन् । बाघको संख्या बढेकैले आरक्षबाट निकुञ्जमा परिणत गरी क्षेत्र विस्तार गरिएको छ ।
पाटेबाघको संख्या सबैभन्दा बढी भारतमा रहेको बताइन्छ । एसियाभर पाटेबाघको संख्या करिब चार हजार छ ।
बाघ घना जङ्गलमा रमाउँछ तर नेपालमा जङ्गल पातलिँदै गएसँगै गाउँपस्ने समस्या बढ्दै गएको छ । जंगल पातलिँदै जानु नै बाघ संरक्षणमा सबैभन्दा ठूलो चुनौती रहेको संरक्षणविद्हरू बताउँछन् ।
प्रकाशित: Dec 31, 2017| 18:23 आइतबार, पुस १६, २०७४