काठमाडौं- बिवाहको दिन बेहुली भागेपछि आफ्नो बेइज्यत भएको भन्दै बेहुलीको हत्या गर्ने काभ्रेपलाञ्चोक रोशी गाँउपालिका-३ राजेश लामालाई केन्द्रीय अनुसन्धान ब्युरोले पक्राउ गरेको छ।
लामालाई ब्युरोको टोलीले शुक्रबार सानेपाबाट पक्राउ गरेको हो। ०६४ पुस २७ गते लामाले मकवानपुर फापरबारी-२ स्थायी घर भएकी २२ वर्षीय (तत्कालीन अवस्थामा) प्रेमिका सुनिता लामालाई ललितपुर इमाडोल- १५ स्थित उनकै डेरामा छुरा प्रहार गरि हत्या गरेका थिए।
२०६४ साल मंसिरको १७ र १८ गते बिवाहको मिति तय भएपछि सुनिता राजेशसँग सम्पर्कै विच्छेद गरी डेराबाट भागेकी थिइन। बिवाहको मिति तय भैसकेको र रद्द हुँदा आफ्नो बेइज्यत भएको भन्दै राजेशले प्रेमिका सुनितालाई हत्या गर्ने योजना बनाएको अनुसन्धानबाट खुलेको छ।
कोही नभएको मौका पारी सुनिताको डेरामा पुगेका राजेशले धारीलो छुरा प्रहार गरी फरार भएका थिए।
अभियुक्त लामा प्रेमिकाको हत्यापछि प्रहरीसँग बच्न हेटौडा पुगेर होटलमा काम गदै आएका थिए। उनी पछिल्लो समय काठमाडौंमा घरमा पेन्टरको काम गर्दै आएको अवस्थामा प्रहरीले सानेपाबाट पक्राउ गरेको हो।
प्रकाशित: Dec 31, 2017| 18:23 आइतबार, पुस १६, २०७४