काठमाडौं- आज, १२ साउनमा बस्ने भनिएको नेपाल कम्युनिष्ट पार्टी (नेकपा) को केन्द्रीय सचिवालय बैठक सोमबार तीन बजेसम्मका लागि सरेको छ ।
आजको बैठकले नेकपाका केही विभागमा नेतृत्वको टुंगो लगाउने तयारी गरिएको थियो । नेकपाका ३२ वटा केन्द्रीय विभागमध्ये अन्य विभागहरुको नेतृत्वमा सहमति भए पनि स्कूल विभागमा विवाद भइरहँदा केन्द्रीय सचिवालय बैठक सर्दै आएको हो ।
स्कूल विभागको नेतृत्वका लागि चर्चामा आएका धेरै नामहरुमध्ये सचिवालय सदस्यद्वय ईश्वर पोखरेल र नारायणकाजी श्रेष्ठबीच प्रतिस्पर्धा छ । दुबै नेताले दाबी नछोड्ने भएपछि हालका लागि स्कूल विभागको नेतृत्व नेकपाका दुई अध्यक्षमध्ये कुनै एकले लिने आन्तरिक तयारी गरेको बुझिएको छ ।
त्यस्तै नेकपामा नेतृत्वका लागि सहमति भएका तीनवटा आयोगमध्ये दुई आयोग पूर्वएमाले समूह र एउटा पूर्वमाओवादी समूहले पाउने समझदारी भएको छ । यी आयोगका अध्यक्ष पार्टीको पदेन स्थायी कमिटी सदस्य हुन्छन् ।
नेकपा स्रोत अनुसार अनुशासन आयोगमा अमृत बोहोरा र लेखा परीक्षण आयोगमा डा.पुष्प कँडेल प्रस्तावित छन् भने निर्वाचन आयोगको अध्यक्षमा अमिक शेरचनको नाम प्रस्ताव गरिएको छ ।
प्रकाशित: Dec 31, 2017| 18:23 आइतबार, पुस १६, २०७४