एजेन्सी- कुसल परेराको शतकको मद्दलले श्रीलंकाले बंगलादेशलाई ३ सय १५ रनको विशाल लक्ष्य सुम्पेको छ । तीन खेलको एकदिवसीय सिरिजका लागि श्रीलंका टुरमा रहेको बंगलादेशलाई घरेलु टोलीले सिरिजको पहिलो खेलमा ८ विकेट गुमाउँदै ३ सय १५ रनको विशाल लक्ष्य सुम्पेको हो ।
टस जितेर पहिले ब्याटिङ गरेको श्रीलंकाले पहिलो विकेट भने सस्तैमा गुमाएको थियो । दोस्रो ओभरको पाँचौ बलमा टोलीको स्कोर १० पुग्दा घरेलु टोलीले अविस्का फर्नान्डोलाई गुमाएको थियो ।
तर, त्यसपछि मैदान प्रवेश गरेका विकेटकीपर ब्याट्सम्यान कुसल परेराले दोस्रो विकेटका लागि कप्तान दिमुथ करुणारत्नेसँग ९७ रनको साझेदारी गरे । करुणारत्नेले ३७ बलमा ४ चौका प्रहार गर्दै ३६ रन जोडे । तेस्रो विकेटका लागि कुसल मेन्डीजसँग परेराले शतकीय साझेदारी गरे ।
परेराले ९९ बलमा १७ चौका र १ छक्काको मद्दतमा १११ रनको शतकीय पारी खेले । चौथो विकेटको रुपमा पेवेलियन फर्किएका मेन्डीजले ४९ बलमा ४ चौका प्रहार गर्दै ४३ रन जोडे । त्यस्तै एन्जेलो म्याथिज अर्धशतक बनाउनबाट दुई रनले चुके ।
उनले ५२ बलमा ३ चौका प्रहार गर्दै ४८ रन जोडेका हुन् । लाहिरु थिरिमानेले २५, धनन्जय डि सिल्भा १८, थिसारा परेरा २ र अविस्का फर्नान्डोले ७ रन जोडे । लाथिस मलिङ्गा ६ रनमा अविजित रहे ।
बंगलादेशका लागि शफिउल स्लामले तीन विकेट लिए । मुस्ताफिजुर रहमानले दुई तथा मेहिदी हसन मिराज, रुबेल होसाइन र सौम्य सरकारले समान एक एक विकेट लिए ।
प्रकाशित: Dec 31, 2017| 18:23 आइतबार, पुस १६, २०७४