लागुऔषधसहित तीन पक्राउ

जनकपुरधाम – सशस्त्र प्रहरीले धनुषाबाट तीनजनालाई प्रतिबन्धित लागुऔषधसहित नियन्त्रणमा लिएको छ। सशस्त्र प्रहरीले सीमावर्ती नाका नगराईन नगरपालिका–२ जटहीबाट बुधबार अबेर राती तीनजनालाई नियन्त्रणमा लिएको हो ।

पक्राउ पर्नेमा धनुषाको मिथिला नगरपालिका–५ का ३६ वर्षीय लक्ष्मण महतो, १७ वर्षीय रामकिशोर महतो र सोही नगरपालिकाको वडा नम्बर ३ बस्ने २२ वर्षीय चन्द्रदेवप्रसाद कुशवाहा रहेको सशस्त्र प्रहरी बल बोर्डर आउटपोस्ट नगराईनका प्रमुख सशस्त्र प्रहरी निरीक्षक मनोज खड्काले जानकारी दिए।

भारतबाट ज ९ प ८३८७ नम्बरको मोटरसाइकल चढेर आइरहेका उनीहरुलाई शंका लागि खानतलाशी गर्दा लागुऔषध फेला परेको खड्काले बताए । उनीहरुको साथबाट २२ बोतल डाइलेक्स डि.सी, नाइट्रोभ्याट ट्याबलेट र स्पास्मो नामक प्रतिबन्धित लागुऔषध बरामद भएको उनले जानकारी दिए।

पक्राउ परेका तीनैजनलाई आवश्यक कारबाहीका लागि नेपाल प्रहरीको जिम्मा लगाइएको प्रहरी निरीक्षक खड्काले बताए।