'भदौबाट पार्टीको राष्ट्रिय अभियान सञ्चालन हुन्छ'

काठमाडौं – नेपाल कम्युनिष्ट पार्टीका अध्यक्ष पुष्पकमल दाहाल प्रचण्डले आगामी भदौबाट पार्टीको राष्ट्रिय अभियान संचालन गर्ने घोषणा गरेका छन्। दुई पार्टीबीच एकता गरेर असाधारण उपलब्धि हासिल गरेको उल्लेख गर्दै प्रचण्डले त्यसबारे जनतालाई जानकारी गराउन भदौमा अभियान सञ्चालन गरिने बताए।

बिहीबार काठमाडौंमा आयोजित एक कार्यक्रममा बोल्दै अध्यक्ष दाहालले त्यसका लागि आवश्यक योजना तय गर्न साउन महिना भित्रै पार्टी केन्द्रिय समिति र स्थायी समिति बैठक बोलाउने योजना रहेको बताए। 

अध्यक्ष दाहालले पार्टीको राष्ट्रिय अभियानको क्रममा पार्टीका नीति तथा कार्यक्रम र सरकारको कामकारबाहीबारे जनतालाई जानकारी गराउने पनि स्पष्ट पारे। उनले सामाजिक न्याय सहितको समृद्धिका लागि आफ्नो पार्टीले काम गरिरहेको दाबी गर्दै सरकारको काम, कारबाहीलाई अझै प्रभावकारी बनाएर लैजाने संकल्प गर्नुपर्नेमा जोड दिए।

पार्टी एकतालाई सदृढ बनाउन र सरकारको काम, कारबाहीलाई अझ प्रभावकारी बनाउन संकल्प गर्न पनि पार्टीका नेता, कार्यकर्तालाई उनले आह्वान गरे। नेपालमा समाजवादको विकास गरी दुनियाँलाई एउटा नयाँ मोडल दिने संकल्प गर्नुपर्नेमा प्रचण्डले बताए।