नेपाल भन्छन् : सरकारको समीक्षा गर्नुपर्छ

काठमाडौं – नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले सरकारको काम, कारबाहीको समीक्षा गर्नुपर्ने माग गरेका छन्। 

नेता नेपालले कमीकमजोरी छन् भने सुधारेर अघि बढन पनि सरकारको काम, कारबाहीको समिक्षा गर्न ढिलाई गर्न नहुने स्पष्ट पारे।

बिहीबार नेपाल कम्युनिष्ट पार्टीका संस्थापक सदस्य नरबहादुर कर्मचारीको छैठौं स्मृति दिवसको अवसर पारेर काठमाडौंमा आयोजित एक कार्यक्रममा बोल्दै उनले सरकारले आफ्नो कमीकमजोरीलाई सुधार गर्दै लैजाने हो भने मुलुकमा कम्युनिष्ट पार्टीको विकल्पको कल्पना गर्न नसकिने दाबी गरे।

कम्युनिष्ट पार्टीसँग मुकाविला गर्ने हैसियत भएको पार्टी नेपालमा कुनै पनि नरहेको दाबी गर्दै वरिष्ठ नेता नेपालले आफ्ना कमीकमजोरीलाई भने स्वीकार गर्दै राम्रो ढंगले काम गर्न जरुरी रहेको बताउँछन्।

उनले पार्टी एकताको बाँकी कामलाई विलम्व नगरी सम्पन्न गर्न पनि पार्टी नेतृत्वलाई दबाब दिन आवश्यक रहेको बताए।