काठमाडौं- नेपाली राष्ट्रिय क्रिकेट टोलीका उपकप्तान ज्ञानेन्द्र मल्लले कीर्तिमान बनाएका छन् । उनले आइसिसी टी–२० विश्वकप एसिया क्षेत्रीय छनोट अन्तरगत मलेसियाविरुद्धको खेलमा कीर्तमान बनाएका हुन् ।
ज्ञानेन्द्रले टी–२० अन्तर्राष्ट्रिय क्रिकेटमा नेपालका लागि सबैभन्दा छिटो अर्धशतक बनाउने खेलाडीको रेकर्ड बनाएका हुन् । उनले मात्र २० बलमा ५१ रनको अर्धशतकीय पारी खेल्दै कीर्तिमानी पारी खेलेका हुन् । उनको अर्धशतकसँगै नेपालले मलेशियालाई ७ विकेटले पराजित गरेको छ।
ज्ञानेन्द्रले २० बलमा ५ चौका र ३ छक्का प्रहार गर्दै ५१ रनको पारी खेले । उनी २१ औं बलमा मुहमद शाहदतको बलमा क्याच आउट भए । यसअघि उक्त रेकर्ड विनोदको नाममा थियो ।
विकेटकीपर तथा आक्रामक ब्याट्सम्यान विनोद भण्डारीले टी–२० क्रिकेटमा मलेसियासँगको दोस्रो टी–२० अन्तराष्ट्रियमा क्रिकेटमा २५ बलमै ५ छक्का र ३ चौका सहित ५१ रनमा अविजित रहेका थिए ।
त्यस्तै पारस खड्काले मलेसियासँगको पहिलो सिजिर खेलमा ३२ बलमा अर्धशतक पुरा गरेका थिए । टी–२० अन्तर्राष्ट्रियमा ज्ञानेन्द्र नेपालबाट अर्धशतक पुरा गर्ने पाँचौ खेलाडी हुन् ।
प्रकाशित: Dec 31, 2017| 18:23 आइतबार, पुस १६, २०७४