मलेसियाविरुद्ध नेपाल ७ विकेटले विजयी

काठमाडौं- आइसिसी टी-२० विश्वकप एसिया क्षेत्रीय छनोट अन्तरगत आफ्नो दोस्रो खेलमा नेपाल ७ विकेटले विजयी भएको छ । ओपनर ब्याट्सम्यान ज्ञानेन्द्र मल्लले कीर्तिमानी अर्धशतकीय पारी खेलेपछि नेपालले मलेसियालाई सहजै ७ विकेटले पराजित गरेको हो । 

मलेसियाले दिएको ८४ रनको लक्ष्य पछ्याएको नेपालले ८ ओभरमा मात्र तीन विकेट गुमाउँदै उक्त लक्ष्य भेट्टायो । नेपालका लागि कप्तान मल्लले ५१ रनको अर्धशतकीय पारी खेले । उनले २१ बलमा ५ चौका र ३ छक्का प्रहार गर्दै ५१ रनको अर्धशतकीय पारी खेलेका हुन् । 

त्यस्तै विनोद भण्डारीले अविजित १३ रन जोड्दा शरद भेषावकरले ३ रन जोडे । अर्का ओपनर ब्याट्सम्यान प्रदिप ऐरीले १२ र दिपेन्द्र सिंह ऐरी २ रनमा पेभिलियन फर्किए । मलेसियाका लागि मुहम्मद साहदतले तीन विकेट लिए ।

यसअघि टस हारेर पहिले ब्याटिङ गरेको मलेसियाले ९ ओभरमा ७ विकेट गुमाउँदै ८४ रनको लक्ष्य सुम्पेको थियो । वर्षाका कारण प्रभावित भएको खेल निर्धारित समयमा सुचारु हुन नसकेपछि खेललाई ९ ओभरमा छोट्याइएको थियो । मलेसियाका लागि सयद अजिजले सर्वाधिक ३० रन जोडे । उनले मात्र १५ बलमा ५ चौका र १ छक्का प्रहार गर्दै ३० रन जोडेका हुन् । 

त्यस्तै विरन्दीप सिंहले १७ बलमा १ चौका र १ छक्का सहित २१ रन जोडे । अन्य ब्याट्सम्यानले भने दोहोरो अंक बनाउन सकेनन् ।

ओपनर ब्याट्सम्यान अन्वर अरुदिन र शाफिक शारिफ शुन्य रनमा पेभिलियन फर्किए । अमिनुद्दीन रामली ५, मुहम्मद साहदत १ र कप्तान अहमेद फाइज ९ रनमा पेभिलियन फर्किए । शर्विन मुनियन्दी ८ र फित्री शाम ३ रनमा अविजित रहे ।

नेपालका लागि सोमपाल कामीले सर्वाधिक तीन विकेट लिए । उनले दुई ओभर बलिङ गर्दै २३ रन खर्चेर तीन विकेट लिएका हुन् । त्यस्तै बसन्त रेग्मीले दुई तथा सन्दीप लामिछाने र करन केसीले समान एक एक विकेट लिए । नियमीत कप्तान पारस खड्कालाई भने ढाडको चोटका कारण यस खेलमा विश्राम दिइएको थियाे । 

यस जितसँगै नेपाल अंक तालिकाको तेस्रो स्थानमा उक्लिएको छ । दुई खेल खेलेका नेपाल एक खेलमा जित र एक खेलमा हार सहित दुई अंक जोडेर अंक तालिकाको तेस्रो स्थानमा उक्लिएको हो । समान खेल खेलेको आयोजक टोली सिंगापुर तीन अंक सहित शीर्ष स्थानमा छ ।

मलेसिया एकमा जित र एकमा हार सहित दोस्रो स्थानमा छ । समान अंक भएपनि मलेसिया रन रेटका आधारमा दोस्रो स्थानमा रहेको हो । दुई खेलेमा दुई अंक सहित कतार चौथो र दुई खेलमा एक अंक जोडेको कुवेत पाँचौ स्थानमा छन् ।