'पार्टी एकताका बाँकी काम साउनमै सकिन्छ'

काठमाडौं - नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले पार्टी एकताको प्रक्रिया अब करिब करिब निष्कर्षमा पुगिसकेको बताएका छन्। उनले एकतामा बाँकी रहेका काम साउनभित्रै सकिने दाबी गरे। 

४१ औं पुष्पलाल स्मृति दिवसका अवसरमा कीर्तिपुरमा आयोजित कार्यक्रममा प्रचण्डले भने,  “एकतालाई औपचारिकता दिन मात्र बाँकी रहेको छ। केही दिनभित्र हामी सबै पार्टी एकता टुङ्ग्याउँछौँ। हाम्रो लक्ष्य यही साउन महिनाभित्र पार्टी एकताका बाँकी रहेका काम टुङ्ग्याउने हो, स्थायी कमिटी तथा केन्द्रीय कमिटीको बैठक पनि बस्छौं।” 

उनले नेपालको जनवादी क्रान्ति मौलिक ढंगले पूरा भएको बताएका छन्। ४१ औं पुष्पलाल स्मृति दिवसका अवसरमा पुष्पलाल प्रतिष्ठानले म्गलबा कीर्तिपुरको चम्पादेवीमा आयोजना गरेको कार्यक्रमलाई सम्बोधन गर्दै उहाँले यस्तो बताउनु भएको हो ।

अध्यक्ष प्रचण्डले पार्टी एकता गरेर नेतृत्वलाई अझ परिपक्व बनाउने ठाउँमा आफुहरु आइपुगेको स्पष्ट पारे। पार्टी एकता निक्कै सुझबुझपूर्ण निर्णयका आधारमा गरिएको उनले बताए। स्पष्ट विचार, राजनीति, विधि पद्धतिका आधारमा संगठनको निर्माण, कम्युनिष्ट मूल्य मान्यताका आधारमा कम्युनिष्ट पार्टीलाई अझ एकताबद्ध बनाएर लैजाने काममा सबै लाग्नुपर्नेमा अध्यक्ष प्रचण्डले बताए।

अहिलेका कम्युनिष्ट पार्टीका नेता तथा कार्यकर्ता पुष्पलालका सन्तान र उत्तराधिकारी भएको प्रचण्डको भनाइ छ। अध्यक्ष प्रचण्डले विभाजन भएको पार्टीलाई एकताबद्ध गर्ने र शसस्त्र किसान संर्घष मार्फत जनवादी क्रान्ति पूरा गर्ने पुष्पलालको योगदानको चर्चा गर्दै पुष्पलालको सोच अनुसारकै विभाजित कम्युनिष्ट पार्टीलाई एकताबद्ध बनाएर उत्तराधिकारी बन्ने काम गरेको बताए।