धनगढी- कैलालीको घोडाघोडी नगरपालिका–११ मा छोराले हँसिया प्रहार गरि बाबुको हत्या गरेका छन् । आमा गम्भीर घाइते भएकी छिन् ।
वडा नम्वर ११ सिसैयाका ५५ वर्षीय उदे रावतले ७५ वर्षीय बाबु काल्चे रावतको हत्या गरेका हुन् ।
इलाका प्रहरी कार्यालय सुखडका प्रहरी निरीक्षक यक्ष जोशीले आइतबार राति बाबु छोराको घरायसी कुरामा झगडा हुदा छोराले बाबुको टाउकोमा हँसिया प्रहार गरेको खुलेको छ ।
छोराले सधै मदिरा सेवन गर्ने र बाबुले मदिरा सेवन नगर भनेर सम्झाउँदा हसिया प्रहार गरेको प्रारम्भिक अनुसन्धानबाट खुलेको जोशीले जानकारी दिए । छोरालाई प्रहरीले नियन्त्रणमा लिईसकेको जनाएको छ ।
यस्तै हँसिया प्रहारबाट रावतकी आमा नन्दा गम्भीर घाईते भएकि छिन् । उनलाई आइतबार राति नै कोहलपुर रेफर गरिएको छ।
प्रकाशित: Dec 31, 2017| 18:23 आइतबार, पुस १६, २०७४