शुक्रबार, मंसिर २०, २०७६

समाज

चाडपर्व सकिएसँगै भारततर्फ लागे युवा

चाडपर्व सकिएसँगै भारततर्फ लागे युवा

धनगढी - चाडपर्व सकिनासाथ कामको खोजीमा भारत फर्कने युवाको संख्या बढेको छ। दसैं, तिहार तथा छठपर्व मनाउन स्वदेश आएका सुदूरपश्चिमेली भारत फर्कन थालेका हुन्।

भारतका विभिन्न सहरमा काम गर्दै आएका कामदारले महिना दिन घरपरिवारसँग बिताए। पर्वको रमाइलो सकिएपछि उनीहरु कर्मथलोतर्फ लाग्न थालेका छन्। तिहार सकिएपछि गौरीफन्टा नाका भएर भारततर्फ जानेको लर्को लागेको छ। चाडपर्वको रमाइलो सकिएसँगै पुनः भारततर्फ लागेको गौरीफन्टा नाकामा भेटिएका नेपाली कामदारले बताए।

दसैं, तिहार तथा छठ मनाउन एक महिनाको बिदा लिएर आएका कैलारी गाउँपालिका-२ का विष्णु बोहरा भारत फर्किए। गौरीफन्टा नाकामा भेटिएका बोहराले नेपालमा रोजगारीको गतिलो माध्यम नभएपछि रोजगारीका लागि भारत जानुपरेको बताए। कैलाली गोदावरी नगरपालिका-१२ वलानीका मनोज पाण्डेले भने, ‘दसैं, तिहार र छठ सकिएपछि अब कर्मथलोमा जान लागेको छु।’

घर परिवारको पालनपोषण गर्नका लागि कमाउन भारततिर जानै पर्ने यस प्रदेशका जनाताको बाध्यता छ। अन्य प्रदेशको तुलनामा सुदूरपश्चिम प्रदेशबाट भारत जाने नेपालीको संख्या बढी छ। गाउँका युवा भारत पलायन भएपछि पहाडी जिल्लाका कतिपय गाउँ युवाविहीन हुने गरेका छन्।

कैलालीको घैला बौनियाका नवराज जोशीले नेपालमा पढेअनुसारको रोजगारी नपाइने गुनासो गरे।

तिहार सकिएपछि कैलालीको त्रिनगर नाकाबाट दैनिक करिब चार सयदेखि साढे चार सय जनासम्म नेपाली भारततर्फ गइरहेका सशस्त्र प्रहरी ५३ नम्बर गुल्मका सशस्त्र प्रहरी नायब उपरीक्षक भोलाप्रसाद कुशवाहाले बताए। ‘अहिले उताबाट आउनेको भन्दा यताबाट जानेको संख्या बढी छ’, उनले भने, ‘हरेक दिन भारत जानेको लस्कर लाग्छ।’

प्रतिक्रिया दिनुहोस्