बिहिबार, मंसिर ५, २०७६

समाचार

व्यवसायी एवं पूर्व राज्यमन्त्री रुप ज्योति पक्राउ

व्यवसायी एवं पूर्व राज्यमन्त्री रुप ज्योति पक्राउ

काठमाडौं- व्यापारिक घराना ज्योति समूहका सदस्य एवं पूर्व अर्थ राज्यमन्त्री रुप ज्योतिलाई प्रहरीले पक्राउ गरेको छ ।

बिहीबार साँझ सिंगापुरबाट काठमाडौं फर्किएलगत्तै महानगरीय प्रहरी परिसर काठमाडौंले उनलाई राति साढे आठ बजे त्रिभुवन अन्तर्राष्ट्रिय विमानस्थलबाट पक्राउ गरेको हो ।

उनलाई प्रहरी परिसर काठमाडौंको हिरासतमा राखिएको डीएसपी होविन्द्र बोगटीले जानकारी दिएका छन् ।

हाउजिङ सञ्चालनको नाममा सर्वसाधारणको रकम ठगी गरेको आरोपमा उनलाई पक्राउ गरिएको हो ।

मंगलबार सर्वोच्च अदालतले ज्योतिलाई पक्राउ गर्न प्रहरीलाई बाटो खोलिदिएको थियो ।

उनलाई शुक्रबार अदालतमा उपस्थित गराउने प्रहरीको तयारी छ ।

हाउजिङका नाममा विभिन्न व्यक्तिसँग रकम उठाई घर नदिएको मुद्दा जिल्ला अदालत काठमाडौंमा परेपछि २०७५ मंसीर २० गते अदालतले उनलाई पक्राउ गरी अनुसन्धान अघि बढाउन आदेश दिएको थियो ।

तर, त्यसविरुद्ध ज्योति सर्वोच्च अदालत गएपछि सर्वोच्चले मुद्दाको अन्तिम किनारा नलाग्दासम्मका लागि उनलाई पक्राउ नगर्न अन्तरिम आदेश दिएको थियो ।

उक्त आदेशको एक वर्षपछि गत मंगलबार सर्वोच्चले ज्योतिको विपक्षमा फैसला दियो । त्यसपछि उनलाई पक्रन प्रहरीलाई बाटो खुलेको हो ।

मंगलबार प्रधानन्यायाधीश चोलेन्द्र शमशेर राणा र न्यायाधीश प्रकाश ढुंगानाको संयुक्त इजलासले रुप ज्यातिको निषेधाज्ञासम्बन्धी रिट खारेज गरिदिएको हो ।

 

प्रतिक्रिया दिनुहोस्